Սիրիահայերն իրենց միջև բաշխվող գումարների մասին պարզաբանումներ են ստացել Սփյուռքի նախարարից
Սփյուռքի նախարարությունն օրեր առաջ սիրիահայերի հետ հանդիպման ժամանակ մանրամասն ներկայացրել է, թե որքան են կազմում նրանց օժանդակելու նպատակով Հայաստան մուտք գործած գումարները, և քանի ընտանիքի է նպաստ հատկացվել: Tert.am-ին այս մասին տեղեկացրեց սիրիահայ Ռոբերտ Սուլահյանը, ով արդեն մեկ տարի է՝ փոխադրվել է Երևան և աշխատում է «Ռաֆայել» բժշկական կենտրոնում։ Նա Facebook սոցիալական կայքում «Հալեպահայեր» (Armenians of Aleppo) անվամբ խմբի 4 կառավարիչներից մեկն է։
Նա տեղեկացրեց, որ հանդիպումը տևել է շուրջ 80 րոպե, որի ընթացքում նախարար Հրանուշ Հակոբյանն ամենայն մանրամասնությամբ ներկայացրել է բոլոր գումարների ելքերն ու մուտքերը:
«Մենք անհամաձայնության հարց չունենք, պարզապես՝տեղյակ չէինք, թե ինչպես են բաշխվել գումարները: Հիմա արդեն բոլոր սիրիահայերը տեղեկացան: Իսկ մնացածն արդեն մեր գործը չէ՝ ճի՞շտ են բաշխվել, ամբողջությա՞մբ են բաշխվել: Բայց մենք իմացանք, թե որ ընտանիքին որքան գումար է տրվել»,-ասաց նա:
Հիշեցնենք, որ օրեր առաջ սիրիահայ ակտիվիստների խումբը մամուլի ասուլիս էր հրավիրել և պարզաբանում խնդրել Սփյուռքի նախարարությունից, թե սիրիահայերին տրամադրվող նպաստը որքանով է ճիշտ ու թափանցիկ բաշխվում։
Ռոբերտ Սուլահյանն ընդգծեց, որ հանդիպումից պարզ է դարձել, որ նախարարությունն իր ձեռքով որևէ գումար չի բաժանել, դա իրականացրել է «Սիրիահայերի խնդիրների համակարգման կենտրոնը»:
«Նախարարությունը միջոց էր, որ այդ օգնությունները հասնեն ու բաժանվեն սիրիահայերին: Եթե քննության կարիք լինի, ապա պետք է քննվի հենց այդ կենտրոնը. խոսքը հաշվապահական քննության մասին է, բայց ես իրավունք չունեմ կասկածելու: Մենք միայն ուզում էինք իմանալ, թե որքան գումար է եկել սիրիահայերի համար, և արդյո՞ք դրանք բաժանված են»,-ասաց նա:
Ռոբերտ Սուլահյանը խոստացավ, որ հանդիպման տեսանյութն առաջիկա օրերին կտեղադրվի Yuotube –ում:










