Կոնյակի շիշ, դոմինոյի հավաքածու, ծառի ճյուղ. Բաշկիրիայում ցուցահանդես են բացել հիվանդների մարմնից դուրս բերված «ցուցանմուշներով»

15:37 • 17.01.14

Բաշկիրիայի հիվանդանոցներից մեկի վիրաբույժները հավաքածու են ստեղծել այն իրերից, որոնք վիրահատությունների ժամանակ հայտնաբերվել են հիվանդների մարմիններում, հայտնում է ԻՏԱՌ ՏԱՍՍ-ը։

 

Ընդհանուր առմամբ, հավաքածուում 70 տարբեր իրեր են, որոնք ցուցանմուշ են դարձել էնդոսկոպիայի բաժանմունքում։ Դրանց թվում են կոնյակի շիշ, եղունգներ, մետաղադրամներ, սպասքի պարագաներ։

 

Կենտրոնական տեղ է զբաղեցնում 27 մասերից բաղկացած դոմինոն։

 

«Այս հավաքածուն փոքր մասն է այն բանի, որոնք ամեն օր մարդկանց որովայնում և շնչուղիներում գտնում են բժիշկները։ Այն սկսել են հավաքել 2005թ.-ից, սակայն շուտով հասկացել են, որ այն կարող է հսկայական չափերի հասնել։ Ինչից հետո որոշվել է «գտածոները» վերադարձնել տերերին, իսկ հավաքածուում ընդգրկել միայն ամենաուշագրավ առարկաները»,-ասել է հիվանդանոցի գլխավոր բժշկի տեղակալը։

 

45 տարվա աշխատանքային փորձով վիրաբույժ Վլադիմիր Կամանևը պատմել է, որ աշխատելու տարիներին ինքն իր հիվանդների մարմնից հանել է ծառի մասեր, գնդիկավոր գրիչների կափարիչներ, անգամ՝ ատամի պրոթեզի մասեր։

 

Նոր տարվա օրերին նա վիրահատել և հիվանդի թոքերից հանել է եղևնու մնացորդներ։ «5 սմ երկարությամբ ճյուղը հիվանդը կուլ է տվել շոգեբաղնիքում՝ եղևնու ճյուղերով լոգանք ընդունելիս»,-ասել է վիրաբույժը։