Իտալացիներին զայրացրել է իտալական նավահանգստում սիրիական քիմիական զենքի վերբեռնման մասին որոշումը
Իտալական Ջոյա-Տաուրո քաղաքի նավահանգստում սիրիական քիմիական զենքի վերբեռնման մասին Իտալիայի կառավարության և միջազգային մարմինների որոշումը բողոք է առաջացրել տեղական բնակչության շրջանում, գրում է gazeta.ru-ն:
Il Sole 24 Ore-ն հաղորդում է, որ Սան Ֆերդինանդոն, Ռոզարնոն ու Ջոյա-Տաուրոն բողոքել են տեղի նավահանգստում գործողության իրականացման մասին իշխանությունների որոշման դեմ:
Ավելի վաղ Իտալիայի տրանսպորտի և ենթակառուցվածքների նախարար Մաուրիցիո Լուպին հայտարարել է, որ վերբեռնման գործողությունը վտանգ չի ներկայացնում և կիրականացվի անվտանգության բոլոր նորմերի պահպանմամբ, հաղորդում է Corrierre de la Sera-ն:
Լուպին հավելել է, որ քիմիական զենքով կոնտեյներները կվերբեռնվեն դանիական նավից ամերիկյան նավի վրա և չեն բեռնաթափվի ցամաքում:
Նախարարը հայտնել է, որ Ջոյա-Տաուրոյի նավահանգիստն ընտրվել է որպես ամենաանվտանգ վայր:










