ՄԱԿ-ի գլխավոր քարտուղարն Իրանին հրավիրել է «Ժնև-2»-ին. սիրիական ընդդիմությունը սպառնացել է չմասնակցել
ՄԱԿ-ի գլխավոր քարտուղար Բան Կի Մունն Իրանին հրավիրել է մասնակցել Ժնևում Սիրիայի խնդրին նվիրված խաղաղ բանակցություններին: Այս մասին նա հայտարարել է Նյու Յորքում իրանցի պաշտոնյաների հետ քննարկումից հետո:
Սիրիայի ընդդիմադիր և հեղափոխական ուժերի ազգային կոալիցիան, Russia Today-ի փոխանցմամբ, սպառնացել է այդ դեպքում հրաժարվել բանակցություններից:
Բան Կի Մունն ասել է, որ Իրանի արտգործնախարար Ջավադ Զարիֆից հավաստիացում է ստացել, թե այդ երկիրը կառուցողական դեր կխաղա բանակցություններում:
Իրանի մասնակցության հրավերն ընդունել է նաև ԱՄՆ-ն, որը մինչ այդ պայմաններ էր առաջ քաշում Թեհրանի համար:
Իրանը և 39 պետությունների ներկայացուցիչներ կայցելեն Մոնտրյո (Շվեյցարիա)` «Ժնև-2»-ից առաջ ընթանալիք նախնական բանակցություններին: «Ժնև-2»-ը սպասվում է հունվարի 24-ին:










