Մոսկվայում «գողական հավաքի» 50 մասնակցի են ձերբակալել

14:59 • 20.01.14

Մոսկվայում ձերբակալվել է «գողական հավաքի» մոտ 50 մասնակից, հայտնում է Lenta.ru-ն՝ վկայակոչելով ՌԴ ՆԳՆ կայքը։

 

Համաձայն մամուլի հաղորդագրության՝ հավաքը տեղի է ունեցել Հյուսիս-արևմտյան վարչական շրջանի ռեստորաններից մեկում։

 

Ձերբակալվածների թվում է եղել «օրենքով գող» Կոնստանտին Վասիլևը (Կոստյա Շրամ), ինչպես նաև Վլադիմիրի մարզի քրեական շրջանակների ներկայացուցիչներ։ Ըստ տեղեկությունների՝ ներկա է եղել նաև օրերս Բանգկոկից վերադարձած «օրենքով գող» Վլադիմիր Օզերսկին (Վովա Զյուզյա)։ Վերջինս հասցրել է լքել ռեստորանը՝ նախքան ոստիկանների ժամանումը։

 

Ըստ որոշ տեղեկությունների՝ հավաքին պետք է մասնակցեին նաև Մուխա և Կոստիլ մականուններով «օրենքով գողերը»։ Սակայն նրանք նույնպես չեն եղել ձերբակալվածների թվում։ Գործակալության տվյալներով՝ չի բացառվում, որ ոստիկաններից որևէ մեկը ձերբակալության մասին տեղեկության արտահոսք է թույլ տվել։

 

Ոստիկանության բաժանմունքում վերցրել են նրանց մատնահետքերը, այժմ ստուգում են հանցագործությունների հետ նրանց կապը։ Ինչպես հայտնի է դարձել ոստիկաններին, հավաքի ընթացքում նախատեսվում էր քննարկել ազդեցության ոլորտների փոփոխությունը։