Թաիլանդցի ցուցարարները պարգև են խոստացել վարչապետին բռնելու դիմաց
Թաիլանդի ընդդիմությունը պարգև է սահմանել այդ երկրի վարչապետի պաշտոնակատար Յինգլաք Չինավաթին բռնելու դիմաց, հայտնում է Взгляд-ը:
Նմանապես պարգև է խոստացվել նաև ոստիկանության գլխավոր վարչության պետի և Խաղաղության պահպանման կենտրոնի ղեկավարին բռնելու համար:
Այս նախաձեռնությամբ հանդես է եկել «Ուսանողները և ժողովուրդը` հանուն Թաիլանդի ժողովրդավարական բարեփոխման» արմատական շարժումը: Նրանք նշված պաշտոնյաներին մեղադրում են «Բանգկոկում չարդարացված արտակարգ իրավիճակ սահմանելու» համար: Շարժումը նշել է, որ խոսքը նրանց բռնելու և իրենց տրամադրելու մասին է:
Բանգկոկում 60-օրյա արտակարգ դրություն է սահմանվել, որի նպատակը փետրվարի 2-ի արտահերթ ընտրություններին անվտանգության ապահովումն է` տևական ժամանակ շարունակվող բողոքի ցույցերի ֆոնին: Վերջիններիս նպատակը գործող իշխանությունների հրաժարականն է:










