Շահագործման հանձնվեց Աբովյան բժշկական կենտրոնը. բացմանը ներկա էր ՀՀ նախագահ Սերժ Սարգսյանը

11:56 • 01.02.14

Մարզային առողջապահական համակարգերի օպտիմալացման ծրագրի համաձայն Աբովյանի հիվանդանոցը և Աբովյանի պոլիկլինիկան միավորվել են. ստեղծվել է «Աբովյանի բժշկական կենտրոն» ՓԲԸ–ն: Այստեղ իրականացվել են բժշկական կենտրոնի եռահարկ հիմնական մասնաշենքի շուրջ 3500 քմ վերակառուցման շինաշխատանքներ: Հիվանդանոցի բացման արարողությանն այսօր ներկա գտնվեց ՀՀ նախագահ Սերժ Սարգսյանը:

 

Հիվանդանոցի տնօրենի պաշտոնակատար Վիկտորիա Միքայելյանը նշեց, որ հիվանդանոցը շահագործման է հանձնվել 1980թ. և մինչ այժմ հիմնանորոգման աշխատանքներ չէին կատարվել, միայն մասնակի կոսմետիկ վերանորոգում:

 

«Սա մենք նախարարության և Համաշխարհային բանկի կողմից նվեր ենք ստացել: 2013թ. հիվանդանոցը բուժօգնություն է ցույց տվել ավելի քան 2600 մարդու և կարծում եմ, որ այսուհետ ավելի շատ մարդու պետք է սպասարկի, քանի որ առաջ մենք շատերին ուղեգրում էինք Երևան, քանի որ չունեինք անհրաժեշտ սարքավորումներ: Կարծում եմ, որ հիվանդանոցը կկանգնեցնի հիվանդների հոսքը դեպի մայրաքաղաք»,-ասաց նա:

 

ՀՀ առողջապահության նախարար Դերենիկ Դումանյանն իր հերթին ընդգծեց, որ հիվանդանոցի հիմնանորոգումը սկսվել է նախագահի անմիջական հանձնարարությամբ:

 

 

 

«Ստեղծել ժամանակակից հիվանդանոց, որը համալրված է տարածաշրջանի ու նաև Հայաստանի համար եզակի սարքավորումներով: Մարզում երկրորդ ժամանակակից սարքավորումն է, առաջինը Հրազդանում է: Աբովյանը թեև մոտ է մայրաքաղաքին, բայց մեր քաղաքականությունն այնպիսին է, որ բոլոր մարդիկ իրենց քաղաքում, իրենց բնակության վայրին մոտ գտնվող հիվանդանոցը ունենան»,-ասաց նա և տեղեկացրեց, որ այս տարի ևս մի քանի հիվանդանոց կվերանորոգվի տարբեր մարզերում

 

Նշենք, որ վերակառուցման աշխատանքների շրջանակում կատարվել է տանիքի ամբողջական փոխարինում, միջնապատերի վերակառուցում, դռների փոխարինում բժշկական վերելակի տեղադրում և հագեցում նոր համակարգերով:

 

Կենտրոնի հիվանդանոցային մասնաշենքում տեղակայվել են հետևյալ ծառայությունները՝ ընդունարան և շտապօգնության ծառայություն, ախտորոշիչ բաժանմունք, 55 մահճակալ ունեցող հիվանդանոցային ծառայություններ, մեծահասակների թերապևտիկ և մանկաբուժական, վիրաբուժական, ինֆեկցիոն բաժանմունքներ:

 

«Աբովյանի բժշկական կենտրոն»-ում իրականացվել է 846 մլն 815 հազ. 500 դրամի ներդրում, որից ՀՀ կառավարության կողմից՝ 211 մլն 704 հազ. 600 դրամ, 635 մլն 113 հազ. 900 դրամ՝ ՀԲ վարկային միջոցներից: