Ֆրանսիայում, Մեծ Բրիտանիայում և Իտալիայում եղանակը տհաճ անակնկալներ է մատուցում (լուսանկարներ)
Ձյան առատ տեղումներ ալպյան երկրներում, հսկայական ալիքներ Իսպանիայում և հեղեղումներ Իտալիայում՝ եղանակը Եվրոպային տհաճ անակնկալներ է մատուցել, որոնց հետևանքով արդեն մի քանի մարդ է զոհվել, հայտնում է Корреспондент-ը։
Վատ եղանակային պայմաններ են միաժամանակ Եվրոպայի մի քանի պետություններում։ Հատկապես շատ են տուժել Իտալիան, Իսպանիան, Սերբիան, Սլովենիան, Ավստրիան և Շվեյցարիան։
Իտալիայում անդադար անձրևները հանգեցրել են ջրհեղեղների, որոնց հետևանքով փետրվարի 2-ին 3 մարդ է զոհվել, այդ թվում՝ 7 տարեկան երեխա։ Պիզայից և շրջակա բնակավայրերից հարյուրավոր մարդիկ են տարհանվել. Առնո գետը դուրս է եկել ափերից։ Բերգամոյի բնակիչները փրկվել են սողանքներից, իսկ Հռոմում 2 օր փակ են եղել բոլոր դպրոցները։
Իսպանիայում հսկայական ալիքները վնասել են զբոսաշրջային ենթակառուցվածքը։ Լուարկա հանգստավայրում մինչև 10 մ երկարությամբ ջրային ալիքները քանդել են հսկայական կաղամարների յուրահատուկ հավաքածուի թանգարանը։ Հաստատությանն ավելի քան 2 մլն եվրոյի վնաս է հասցվել։






Ուժեղ ձյունը հանկարծակիի է բերել Սերբիայի և Սլովենիայի բնակիչներին։ Մոտ 1.000 մարդ Սերբիայի հյուսիսային շրջաններում մնացել են ձյան տակ ավտոբուսներում և իրենց ավտոմեքենաներում։


Շվեյցարիայի և Ավստրիայի լեռնային շրջաններում սողանքների վտանգ կա։ Ավստրիական Ալպերում արդեն զոհվել է մեկ մարդ։ Շվեյցարիայում վատ եղանակի պատճառով խախտվել է երկաթուղային հաղորդակցությունը։
Առատ հեղեղները ծածկել են գրեթե ողջ Մեծ Բրիտանիան, առավել ուժեղ տուժել են հարավային շրջանները, որտեղ հունվարը ամենաանձրևոտն էր դիտարկումների ամբողջ պատմության ընթացքում։




















