Չարորակ ուռուցքը ոչ թե դատավճիռ է. այլ բուժման ենթակա հիվանդություն. Ուռուցքաբանության ազգային կենտրոնի տնօրեն
Ուռուցքաբանության ազգային կենտրոնի տնօրեն Հայրապետ Գալստյանը քաղցկեղի դեմ պայքարի միջազգային օրվա կապակցությամբ հրավիրված ասուլիսում հայտարարեց, թե մեր երկրում տարեցտարի ավելանում է չարորակ ուռուցքներով հիվանդների թիվը:
«Առողջապահության նախարարությունն իր ենթակառուցվածքներով և մասնագիտական կենտրոններով զգալի աշխատանքներ է տանում չարորակ ուռուցքների առաջացումը կանխարգելելու և պաշտպանելու ուղղությամբ»,-ասաց Հայրապետ Գալստյանը:
Բանախոսը տեղեկացրեց, որ մեր հանրապետությունում 2002թ. հայտնաբերվել է 5737 նոր հիվանդ, իսկ 2012թ.` 7877: Եթե 2002թ. 100 հազար բնակչի հաշվարկով հիվանդացությունը կազմում էր 179 դեպք, ապա 10 տարի անց`240: «Բնակչությանը պետք է ներշնչել այն գաղափարը, որ չարորակ ուռուցքը ոչ թե դատավճիռ է, այլ բուժման ենթակա հիվանդություն»,-ասաց մասնագետը՝ շարունակելով, թե պետք է խուսափել նստակյաց կյանքից, ծխելուց, ապխտած կերակուրներից և նմանատիպ վտանգավոր երևույթներից, փոխարենը ապրել առողջ ապրելակերպով:
«Մեր հանրապետությունում չարորակ ուռուցքների բարձիթողությունը հասնում է 45 տոկոսի: Պետք է ամեն ինչ անել, որպեսզի դա հնարավորինս կանխենք, իսկ ԱՀԿ-ի տվյալներով 35 տոկոսով չարորակ ուռուցքների առաջացումը կարելի է կանխել առողջ ապրելակերպով»,-հայտարարեց Հայրապետ Գալստյանը:
Ուռուցքաբանության ազգային կենտրոնի տնօրենն ասաց, որ իրենց կենտրոնում ճառագայթային բուժման նոր և հզոր սարք է ներդրված, և բուժումն անց է կացվում միջազգային չափանիշներին համապատասխան:
Ըստ նրա՝ խնդիրներ կան քիմիաթերապիայի ասպարեզում, հերթեր են գոյանում: «Պետպատվերի շրջանակներում հերթագրում է իրականացվում: Դժվարություններ են առաջանում. որպեսզի դրանք հաղթահարենք, եռահերթ ռեժիմի ենք անցել: Պետական հատկացումները հաճախ չեն բավարարում վերջին սերնդի տեխնիկայով բուժումն իրականացնելու համար: Այնպիսի դեղամիջոց կա, որի մեկ ներարկումն արժե 3100 եվրո»,-նշեց մասնագետը:
Հայրապետ Գալստյանը հաղորդեց նաև, որ ամեն տարի աշխարհի բոլոր երկրներում չարորակ ուռուցքներով հիվանդացության աճ է նկատվում: Առողջապահության համաշխարհային կազմակերպության տվյալներով՝ 2020թ. մոլորակի վրա կարձանագրվի քսան միլիոն նոր դեպք, մահացությունը կհասնի տասը միլիոնի:










