Oral-B-ն ներկայացրել է ատամի «խելացի» խոզանակ (լուսանկարներ)

Բերանի խոռոչի հիգիենայի պարագաների արտադրությամբ զբաղվող Oral-B ընկերությունը ստեղծել է «խելացի» խոզանակ, որը կապ է հաստատում օգտատիրոջ սմարթֆոնի հետ, երբ վերջինս լվանում է ատամները։ 

Ինչպես նշում է Daily Mail-ը, խոզանակը զգում է ատամները լվանալու ժամանակ մարդու արած սխալ շարժումները և անմիջապես այդ տեղեկությունն ուղարկում նրա հեռախոսին։ Օրինակ՝ սարքը կարող է մարդուն տեղեկացնել, որ նա չափազանց երկար կամ կարճ է լվանում ատամները, ինչպես նաև ցույց է տալիս բերանի խոռոչի այն հատվածները, որոնց օգտատերը պետք է ավելի շատ ուշադրություն դարձնի։

Օգտատերը կարող է ընթերցել խոզանակի ուղարկած ծանուցումներն ու հետագայում ավելի ճիշտ մաքրել ատամները՝ պահպանելով դրանց ու լնդերի առողջությունը։

SmartSeries էլեկտրական խոզանակը Bluetooth-ի միջոցով հասանելի է և՛ iPhone-ի, և՛ Android-հեռախոսների համար։
Այն վաճառքում կհայտնվի հունիսին՝ 330 դոլար գնով։