Բրիտանուհու ստեղծած սարքը կօգնի «ոտքի կանգնեցնել» անվասայլակին գամված երեխաներին (լուսանկարներ)

Բրիտանուհի Դեբի Էլնաթանի ստեղծած սարքը քայլելու հնարավորություն է ընձեռել նրա՝ գլխուղեղի կաթվածի պատճառով անվասայլակին գամված որդուն՝ Ռոթեմին, հայտնում է Daily Mail-ը՝ ընդգծելով, որ սարքը կարող է օգնել է անթիվ-անհամար հաշմանդամ երեխաների։

Մայրը հատուկ որդու համար նախագծել է հարմարանք, որը տղային թույլ է տվել ուղիղ կանգնել ու մոր հետ միասին քայլեր անել։ Upsee կոչվող սարքը, որը հաջողությամբ փորձարկվել է Մեծ Բրիտանիայում, Կանադայում ու ԱՄՆ-ում, շուտով վաճառքի կհանվի նաև աշխարհի տարբեր երկրներում։

Upsee-ն բաղկացած է երեխայի համար նախատեսված հեծելասարքից, որը հատուկ գոտու միջոցով ամրացվում է ծնողին, ինչպես նաև յուրահատուկ սանդալներից, որոնք հնարավորություն են տալիս ծնողին ու երեխային միաժամանակ քայլեր անել։ Upsee-ի առավելություններից մեկն այն է, որ քայլեր անելու ժամանակ ծնողի ու երեխայի ձեռքերն ազատ են մնում՝ հնարավորություն տալով նրանց ուրիշ բաներով զբաղվել։