Շոտլանդիայում ցողունային բջիջներից ստեղծված արհեստական արյուն կներարկեն

Հիվանդներին առաջին անգամ ցողունային բջիջներից ստեղծված արհեստական արյուն կներարկեն: Այս մասին հաղորդում է Meddaily-ն՝ հղում կատարելով The Times-ին:

Շոտլանդիայի արյան փոխներարկման ազգային ինստիտուտի տնօրեն Մարկ Տերները, ով գլխավորում է էդինբուրգի համալսարանի նախագիծը, նշել է. «Մենք առաջին անգամ ենք արյան բջիջներ ստեղծել, որոնք համապատասխանում են մարդկային օրգանիզմին»:

Ըստ նրա՝ ուսումնասիրությունը, որը նախատեսվում է անցկացնել 2016թ.-ին, ճանապարհ կբացի արյան արտադրության համար և վերջո նույնիսկ կփոխարինի դոնորական արյանը:

Փորձարկմանը մասնակցող հիվանդներն ի սկզբանե կստանան մոտ 5 մլ արյուն, որը կստուգի, թե արդյոք բջիջները կկարողանան հարմարվել օրգանիզմին:

Պրոֆեսոր Տերները նշել է, որ նման բացահայտման հայտարարությունը չպետք է ազդակ հանդիսանա նվիրաբերվող արյան դադարեցման համար, սակայն ենթադրել է, որ քսան տարի անց արհեստական արյունը սովորական բնույթ կկրի: