ԱՄՆ-ն Թուրքիային պատժում է այն ժամանակ, երբ դա իր շահերից է բխում. Ռուբեն Մելքոնյան

22:39 • 18.04.14

Թուրք-ամերիկյան հարաբերությունները մանրամասն իմացող մարդը պետք է հասկանա, որ Ամերիկան իր ռազմավարական կարևորագույն դաշնակցին չի պատժի հայ ժողովրդի ողբերգության համար: Tert.am-ի հետ զրույցում ասաց թուրքագետ, ԵՊՀ արևելագիտության ֆակուլտետի փոխդեկան Ռուբեն Մելքոնյանը՝ պատասխանելով հարցին, թե ինչպես է մեկնաբանում շրջանառվող լուրերը, որ ԱՄՆ-ն և Եվրոպան, Հայոց ցեղասպանության և քեսաբահայության խնդիրների մասին որոշ բանաձևեր շրջանառության մեջ դնելով, փորձում են պատժել Թուրքիային:

 

«Ամերիկան բազմիցս ցույց է տվել, որ Թուրքիային պատժում է, երբ դա կոնկրետ իր շահերին է վերաբերում»,-նշեց Ռուբեն Մելքոնյանը, ապա ավելացրեց. «Երբ Թուրքիան այլ դիրք զբաղեցրեց Իրաքի դեմ ամերիկյան ռազմական գործողությունների ժամանակ, Ամերիկան որոշակիորեն պատժեց Թուրքիային»:

 

Թուրքագետը, սակայն, չի կարծում, թե բարոյական հարթությունում գտնվող՝ Հայոց ցեղասպանության հարցի համար Ամերիկան ռեալ պատժամիջոցների կանցնի:


Նրա կարծիքով՝ ԱՄՆ-ի և Թուրքիայի միջև չգրված մի խաղի կանոն է դարձել այն, որ ամեն ապրիլի 24-ին ընդառաջ Ամերիկան, հաշվի առնելով հայ համայնքի խնդիրները, որոշակի քայլեր, կիսաքայլեր պետք է անի, Թուրքիան էլ պետք է դրան արձագանքի:


«Սրա հետ մեծ հույսեր պետք չէ կապել»,-ասաց թուրքագետը: