Կիևը չի պատրաստվում դադարեցնել հատուկ գործողության ակտիվ փուլը. Ավակով
Ուկրաինայի ներքին գործերի նախարար Արսեն Ավակովը հայտնել է, որ երկրի նոր իշխանությունները մտադիր չեն դադարեցնել հատուկ գործողությունների ակտիվ փուլը Կրամատորսկ (Դոնեցկի շրջան) քաղաքում, տեղեկացնում է Взгляд-ը։
«Օպերացիայի ակտիվ փուլը շարունակվել է լուսաբացին. կանգ չենք առնում»,-գրել է Ավակովը Facebook սոցկայքի իր էջում։
Պաշտոնյան նաև հավելել է, որ գիշերը Կրամատորսկում Ազգային գվարդիայի մարտիկների և Ուկրաինայի զինված ուժերի իրականացրած օպերացիայի արդյունքում հետ է գրավվել հեռուստատեսային աշտարակը։
Աղբյուրը հիշեցնում է, որ նախօրեին Կրամատորսկ քաղաքում բախումներ են սկսվել, երբ երկրի դաշնայնացման կողմնակիցների կողմից արգելափակված ուկրաինական զրահատեխնիկայի ավտոշարասյունը որոշել է գրոհի անցնել։ Զինվորները, կորցնելով համբերությունը, սկսել են սկզբում օդ կրակել, իսկ հետո նրանց, ովքեր փորձել են դադարեցնել կրակահերթը։
Ըստ նախնական տվյալների՝ միջադեպի հետևանքով զոհվել է 1 մարդ, վնասվածքներ ստացել՝ 10-ը։










