Ուկրաինայի արևելքում հակաահաբեկչական գործողությունը կշարունակվի. Տուրչինով

12:34 • 05.05.14

Հակաահաբեկչական գործողությունն Ուկրաինայի արևելքում կշարունակվի և կտա իր արդյունքները: Այդ մասին հայտարարել է Ուկրաինայի նախագահի պաշտոնակատար Ալեքսանդր Տուրչինովը «5 канал»-ին տված հարցազրույցում, գրում է УНИАН-ը:

 

Նրա խոսքով՝ արևելյան շրջաններին օգնելու և մյուս շրջաններում անջատողական գործողություններն անհնարին դարձնելու նպատակով ՆԳՆ-ին կից ստեղծվում են հատուկ ստորաբաժանումներ, և այսօրվա դրությամբ արդեն գործում է յոթ այդպիսի գումարտակ:

 

Ընդ որում՝ Տուրչինովը բարձր է գնահատել Ազգային գվարդիայի պրոֆեսիոնալ գործողությունները հակաահաբեկչական գործողության ժամանակ:

 

Տուրչինովի խոսքով՝ արևելյան շրջաններում հակաահաբեկչական գործողությունների անցկացումը դժվարանում է, «որովհետև այդ շրջանների բնակիչներն աջակցում են անջատողականներին»։

 

Նա նաև նշել է, որ ոստիկանության որոշ աշխատակիցներ նույնպես համակրում են անջատողականներին: Այդ պատճառով, Տուրչինովի խոսքով, այդ շրջաններում պետք է գրեթե ամբողջությամբ թարմացնել իրավապահ կառույցները։