Միշտ որդին ավելի շատ է իմացել, քան հայրը, իսկ հիմա եկել ենք այն վիճակին, որ հաջորդ սերունդն ավելի դմբո է. Ա. Մանուչարյան

16:08 • 06.05.14

Ներկայիս գլոբալ քաղաքականության իրավիճակի լավագույն գնահատականը «Ղարաբաղ» կոմիտեի անդամ Աշոտ Մանուչարյանի խոսքով՝ 2000 տարի առաջ մի խելոք մարդ է տվել, այն է՝ հպատակների ստամոքսը պետք է լիքը լինի, գլուխները՝ դատարկ։ «Այս գործիքի կառավարումը հասել է կատարելության և փորձում են մարդկությանն առավելագույնս հիմարացած պահել»,- լրագրողների հետ հանդիպմանն ասաց նա և օրինակ բերեց, որ եթե սոցիալիստական համակարգում կրթական համակարգը կատարելագործմանն էր ուղղված, այժմ արդեն աշխարհաքաղաքական ուժերն անցել են ապակրթացման։


«Կրթության մակարդակը կտրուկ ընկել է»,- ասաց նա և օրինակ բերեց Երևանի մայր բուհը, թե վերջին հինգ տարում ԵՊՀ-ն համաշխարհային բուհական համակարգում 500-րդ հորիզոնականն է իջել։


«Սա բերել է նրան, որ մենք չենք հասկանում, որ մենք վերջին սերունդն ենք, որն ավելի անգրագետ ենք, քան մեր նախորդները, մինչև այդ մենք միշտ աճել ենք, միշտ որդին ավելի շատ է իմացել, քան հայրը, պապն ավելի քիչ է իմացել, քան նրա տղան, իսկ հիմա եկել ենք այն վիճակին, որ հաջորդ սերունդն ավելի դմբո է, իսկ այդ նույն դմբոյին սովորեցնում են, թե ինքն ավելի ազատ է ու ինչ ուզի կանի»,- ասաց նա։


«Մենք պետք է սա կարողանանք լուծել, խորքային լուծել, Ուկրաինայում ի՞նչ եղավ, երիտասարդությունը վեր կացավ և իր տունը քանդեց և նման ճակատագիր է սպասվում նաև այլևայլ երկրներում»,- ասաց նա և ընդգծեց, թե դրանից ապահովագրված չէ նաև Հայաստանը, քանի որ այստեղ էլ երկբևեռ «կլիշեներ» են բերում, մի կողմը՝ կեցցե ազատատենչ Ուկրաինան, մի մասն էլ ՝ կեցցե Ռուսաստանը։


«Եվ դրա համար պետք է սովորենք չբաժանվել ճամբարների ու իրար խփել։ Մեկը պաշտպանում է Մայդանին, մեկը՝ հակամայդանին»,- ասաց նա։