Վենեսուելայում սպանվել է նախագահի թիկնապահը
Կարակասում սպանվել է նախագահ Նիկոլաս Մադուրոյի թիկնապահներից մեկը, հաղորդել է հարավամերիկյան հանրապետության գլխավոր դատախազությունը։
Ինչպես տեղեկացնում է Взгляд-ը, սկսվել է հետաքննություն։ Լեյտենանտ Մարկո Կորտեսը սպանվել է մայիսի 4-ին՝ մայրաքաղաքի շրջաններից մեկում։
«Համաձայն նախնական տվյալների՝ Կորտեսն իր մեքենայով ընթանալիս է եղել, երբ նրա վրա կրակել են կողքով անցնող մեքենայից»,-ասված է գլխավոր դատախազության հայտարարության մեջ։
Ըստ տարածված տեղեկության՝ լեյտենանտին սպանել են հանցագործները, որոնք ցանկացել են տիրանալ նրա մեքենային։
Պարբերականը նշում է, որ Կորտեսը եղել է նախագահի անձնական թիկնազորում վերջին 6 տարիների ընթացքում։ Նա ապահովել է ոչ միայն Մադուրոյի, այլև նրա նախորդի՝ Ուգո Չավեսի անվտանգությունը։
Անցյալ շաբաթվա ընթացքում Կարակասում սպանվել էր ազգային հետախուզության նախկին ղեկավար, պաշտոնանկ կապիտան Էլիեսկեր Օտաիսան։ Նրա մարմինը հայտնաբերվել էր ամայի վայրում՝ հրազենային 4 վերքերով։










