Ես իմ խոսքերը երբեք հետ չեմ վերցնի. Իվան Վոլինկին

14:08 • 09.05.14

Հայաստանում Ռուսասանի դեսպան Իվան Վոլինկինը այսօր հաղթանակի զբոսայգում պատասխանելով լրագրողների հարցերին նշեց, որ իր վերջին հայտարարությունը բացասական են ընդունել ոչ թե Հայաստանում ընդհանրապես, այլ առանձին կառույցներ:

«Կրկնում եմ` ես կոչ չեմ անում Հայաստանից գնալ, այլ՝ բոլոր հարցերում ազնիվ լինել: Ես իմ խոսքերը երբեք հետ չեմ վերցնի, պարզապես այլ հարց է, որ իմ խոսքերը կարող են իրենց ցանկացած ձևով մեկնաբանել: Ես եկել եմ այստեղ, որպեսզի երկու ազգերի միջև լավ հարաբերությունները շարունակվի` փոխադարձ հարգանքի ու սիրո վրա, իսկ թե ինչպես կմեկնաբանեն իմ խոսքերն առանձին մարդիկ, դա արդեն իրենց խղճի վրա է»,-ասաց նա:

Իվան Վոլինկինը նշեց, որ յուրաքանչյուրի իրավունքն է քննադատել, սակայն յուրաքանչյուրը յուրովի է մեկնաբանում՝ ըստ իր խղճի և մտքի:

Հիշեցնենք, որ դեսպանը հարցազրույցը տվել է Մոսկվայում լույս տեսնող հայկական «Ноев Ковчег» ռուսալեզու պարբերականին և նշել, որ պետք է զբաղվել ՀՀ-ում գործող այն հասարակական կազմակերպությունների չեզոքացմամբ, որոնք ցանկանում են սեպ խրել հայ-ռուսական հարաբերություններում: