Honda-ն ներկայացրել է Asimo ռոբոտ-մատուցողին (լուսանկարներ, տեսանյութ)

Ճապոնական Honda ընկերությունը, որը հիմնականում զբաղվում է մեքենաների արտադրությամբ, ստեղծել է նոր ռոբոտ, որը ստանձնել է հմուտ մատուցողի պարտականությունները։ Ինչպես նշում է The Daily Mail-ը, նորույթը, որը ստացել է Asimo անվանումը, կարողանում է խոսել, բացել խմիչքների խցաններն ու զգուշորեն մատուցել դրանք։

Աղբյուրը նշում է, որ Asimo-ն աշխարհի ամենազարգացած հումանոիդ ռոբոտն է։ Ի դեպ, Honda-ն սկսել է այս ռոբոտի ստեղծման ուղղությամբ աշխատել դեռևս 1986թ.՝ ներկայացնելով մի շարք մոդելներ։ Սակայն վերջինն առանձնանում է տեխնիկական առավելություններով. այն կարող է հետուառաջ վազել, ցատկոտել, մագլցել, իջնել ու բարձրանալ աստիճաններով։

Բացի այդ, այն այնքան «խելացի է», որ կարողանում է տարբերել միաժամանակ իրար հետ խոսացող մարդկանց ձայները, ինչպես նաև փոխում է տեղաշարժի ուղղությունը, երբ զգում է, որ իր կողմ մարդ է գալիս։

Սարքն ունի 1.3 բարձրություն և շարժվում է 9 կմ/ժ արագությամբ։ Ժպտերես Asimo-ն խոսում է անգլերեն ու ճապոներեն։ Ամբողջական լիցքավորման դեպքում այն աշխատում է 40 րոպե։