Պեկինում ներկայացվել է հոլոգրաֆիկ էկրանով առաջին սմարթֆոնը (տեսանյութ)

Պեկինում ներկայացվել է օդում տեսողական պատկերներ ստեղծող սմարթֆոնը: Նման սարքավորումները հանդիսատեսին ծանոթ են ֆանտաստիկ ֆիլմերից, որոնց հերոսները նման սարքեր են օգտագործում:

Ինչպես ներկայացնում է rg.ru-ն` china.org-ին հղումով, սմարթֆոնի ներկայացման ժամանակ հանդիսատեսը ականատես է եղել, թե ինչպես է հոլոգրաֆիկ տեխնոլոգիան նախագիծ ստեղծում` կիրառելով հայացքի ուղղությունը: Արդյունքում օգտատիրոջ մոտ այնպիսի տպավորություն է ստեղծվում, ասես ներկայացված օբյեկտը նրա առջև է գտվում, և կարելի է այն դիտարկել բոլոր կողմերից:

3D հոլոգրաֆիկ էկրանի առաջին գործող նախատիպը բջջային սարքավորումների համար ստեղծել և ներկայացրել է չինական ShenZhen Estar Displaytech ընկերությունը: Ներկայացված մոդելն ստացել է Takee անվանումը: Այն ունի 5.5 դյույմ էկրան և թույլ է տալիս օգտատիրոջը՝ նմանօրինակ տեսողական էֆեկտներ դիտել: Սմարթֆոնի մյուս տեխնիկական հատկությունները դեռևս չեն հաղորդվում: