Ստոկհոլմում Էբոլայի կասկածանքով հիվանդ է հոսպիտալացվել
Շվեդիայի մայրաքաղաք Ստոկհոլմում Էբոլա վիրուսով վարակման կասկածանքով հիվանդ է հոսպիտալացվել, հաղորդում է ИТАР-ТАСС-ը:
Հիվանդն Աֆրիկայից ներգաղթյալ է: Նա ինքն է դիմել բուժօգնության, ինչից հետո նրան հոսպիտալացրել են տեղի հիվանդանոցի վարակաբանական բաժնում՝ մանրազնին հետազոտություն անցնելու համար:
«Հավանականությունը, որ դա Էբոլա է, չնչին է, բայց մենք չափազանց խիստ կանոններ ունենք»,- ասել է քաղաքի համաճարակային ծառայության ղեկավարը:
Հաղորդվում է, որ Շվեդիայում սա առաջին դեպքը չէ, երբ բժիշկները ստուգում են մարդկանց այդ վարակի առկայության առնչությամբ:
Փորձագետների պատասխանը վերջին դեպքի վերաբերյալ սպասվում է մեկ օրվա ընթացքում:
Վերջին տվյալների համաձայն՝ հիվանդության բռնկումն արդեն խլել է 1.552 մարդու կյանք:










