Ամուսնալուծությունների հիմնական պատճառը՝ տղամարդիկ գնում ու չեն վերադառնում. իրավաբան

19:46 • 04.09.14

Ամուսնալուծությունների թվի ավելացման հիմնական պատճառներից մեկն ընտանիքների սոցիալական ծանր վիճակն է, զույգերի հիմնական խնդիրները կենցաղային են, ինչից դրդված՝ շատ անապահով ընտանիքներում ամուսինները Հայաստանում աշխատանք չունենալու պատճառով գտնվում են արտերկրում: Տղամարդիկ գնում են և չեն վերադառնում: Tert.am-ի հետ զրույցում նման տեսակետ հայտնեց «Ձեր իրավախորհրդատու» ՍՊԸ-ի հիմնադիր Վարդան Խեչյանը՝ ներկայացնելով ամուսնալուծությունների թվի աճի հիմնական պատճառները:

 

«Պատճառներից է նաև այն, որ բոլոր դեպքերում հիմա մենք ապրում ենք ինտերնետային դարում, և ինֆորմացիայի շատ մեծ հոսքերի պատճառով մարդկանց մոտ մեծ տեղեկատավություն է կուտակվում, որն էլ ամուսնալուծությունների պատճառ է դառնում»,-ասաց նա:

 

Վերջինիս փոխանցմամբ՝ ներկա պահին որոշ մարզերում չկան ամուսնալուծության վկայականներ, ինչը նույնպես պայմանավորված է նրանով, որ տարվա այդ ժամանակահատվածի համեմատ ամուսնալուծությունների տոկոսային հարաբերությունը բավականին մեծացել է, մոտ 30 տոկոսով ավելացել են ամուսնալուծությունների դեպքերը:

 

Իրավաբանը նաև նշեց, որ ամուսնալուծությունների դեպքում երեխաների հարցը հիմնականում որոշվում է ծնողների փոխադարձ համաձայնությամբ: Եթե չկա փոխադարձ համաձայնություն, ապա ծնողներից մեկը կարող է դատական կարգով պահանջել, որ երեխայի նկատմամբ ստանձնի խնամակալություն:

 

Հիշեցնենք, որ ինչպես այսօր Կառավարության նիստում տեղեկացրեց արդարադատության նախարար Հովհաննես Մանուկյանը՝ թեև տարեսկզբին նախատեսվել է ձեռք բերել ամուսնալուծության 3000 վկայական, սակայն վերլուծելով առաջին կիսամյակի արդյունքները՝ անհրաժեշտություն է առաջացել 2-րդ կիսամյակի համար ավելացնել ամուսնալուծության վկայականների քանակը: