ՄՄ-ին ու ԵՏՄ-ին Ղրղզստանի անդամակցության շուրջ բանակցությունները մոտ են ավարտին. Լավրով

17:19 • 04.09.14

Մաքսային միությանն ու Եվրասիական տնտեսական միությանը Ղրղզստանի անդամակցության շուրջ բանակցությունները մոտ են ավարտին: Այդ մասին հայտարարել է ՌԴ արտաքին գործերի նախարար Սերգեյ Լավրովը ղրղզ գործընկեր Էրլան Աբդըլդաևի հետ բանակցությունների ավարտից հետո, հայտնում է ԻՏԱՌ ՏԱՍՍ-ը:

 

«Մենք շահագրգռված ենք, որ մայիսի 29-ին Աստանայում կայացած գագաթաժողովի ընթացքում Ռուսաստանի, Բելառուսի, Ղազախստանի և Ղրղզստանի նախագահների սկզբունքային պայմանավորվածությունները հնարավորինս շուտ իրականացվեն»,- նշել է նախարարը:

 

Լավրովը նաև ողջունել է Ղրղզստանի կառավարության կողմից մի շարք որոշումների ընդունումը, որոնք հավանության են արժանացնում ՄՄ-ին և ԵՏՄ-ին երկրի անդամակցության վերաբերյալ փաստաթղթերը:

 

Նախարարը նաև նշել է, որ զուգահեռաբար ավարտվում է ռուս-ղրղզական փաստաթղթերի համաձայնեցումը: «Այդ բանակցությունները մոտ են ավարտին: Հուսով եմ, որ մոտ ժամանակներս դրանք կստորագրվեն»,- ասել է Լավրովը: