200 ամերիկացի զինվորական կմասնակցի Ուկրաինայում կազմակերպվող զորավարժություններին
ԱՄՆ-ն սեպտեմբերին 173-րդ օդադեսանտային ջոկատից մոտ 200 զինվորական կուղարկի մասնակցելու Ուկրաինայում ամենամյա զորավարժություններին: Այդ մասին հայտարարել է Պենտագոնի մամուլի քարտուղար գնդապետ Սթիվեն Ուորենը:
Զորավարժությունները նախատեսված են սեպտեմբերի 13-26-ին և տեղի կունենան Յավորով քաղաքում՝ Լվովից 60 կիլոմետր արևմուտք: Զորավարժություններին կմասնակցեն մի քանի պետություններ:
«Դա խաղաղապահ զորավարժություններ են»,- բացատրել է զինվորականը:
Բացի այդ, ամերիկյան ռազմածովային ուժերը հաջորդ շաբաթ Սև ծովում կմասնակցեն ծովային զորավարժությունների Ուկրաինայի, Թուրքիայի, Վրաստանի և Ռումինիայի հետ: Այդ զորավարժությունների նպատակը տարածաշրջանային անվտանգության ամրապնդումն է և դաշնակիցների և գործընկերների միջև փոխգործակցության հաստատումը: Սև ծովում նախատեսվող զորավարժություններին կմասնակցի «Ռոս» հակահրթիռային կործանիչը և մոտ 280 ամերիկացի նավաստի:










