Թուրքիան իրավական հիմքեր ունի ԱՄՆ-ից պահանջելու հայտնի կրոնական առաջնորդ Գյուլենի արտահանձնումը. Դավութօղլու

12:30 • 08.09.14

Թուրքիայի վարչապետ Ահմեթ Դավութօղլուն հայտարարել է, որ հնարավոր է դարձել թուրք կրոնական գործիչ Ֆեթհուլլահ Գյուլենի արտահանձնումը պահանջել ԱՄՆ-ից, հայտնում է Internethaber.com-ը:

 

Դավութօղլուն, մասնավորապես, ասել է, որ Թուրքիայի զարգացումներին միջամտող գործչի գործունեության առիթով հետաքննությունը թույլ է տվել հավաքել բոլոր անհրաժեշտ փաստաթղթերը, որոնք էլ հենց արտահանձնում պահանջելու հիմք են տալիս:

 

Լրագրողների հետ զրույցում Դավութօղլուն շեշտել է, որ Թուրքիայի քաղաքական բնագավառին դրսից միջամտելու փորձերի առկայության դեպքում Թուրքիան էլ իրավունք ունի կանխել նման փորձերը:

 

Ըստ Դավութօղլուի՝ ակնհայտ են կապերն այժմ ԱՄՆ-ի Փենսիլվանիա նահանգում ապրող Գյուլենի և Թուրքիայում իշխանությունը տապալելու փորձերի միջև:

 

ԶԼՄ-ների փոխանցմամբ՝ Գյուլենի արտահանձնման հարցն ԱՄՆ-Թուրքիա բանակցությունների առարկա էր դարձել ՆԱՏՕ-ի Ուելսի գագաթաժողովում: Գյուլենի անունը կապվում է ներկայիս նախագահ Ռեջեփ Թայիփ Էրդողանի, նրա որդու և մերձավոր շրջապատի կոռուպցիոն գործունեությունը բացահայտած գաղտնալսումների հետ: