Որևէ վտանգ քառյակի գործունեությանը չեմ տեսնում. քառյակը վաղը կքննարկի իշխանությանը տրված ժամկետի հարցը. Լ. Զուրաբյան

14:39 • 08.09.14

Որևէ վտանգ քառյակի գործունեությանը չեմ տեսնում, որովհետև քառյակի օրակարգն առանց այդ էլ շատ լայն է. Tert.am-ի հարցին ի պատասխան, թե հաշվի առնելով քառյակում առկա տարաձայնությունները, հնարավո՞ր է՝ քառյակը տարանջատվի, ասաց «Հայ ազգային կոնգրես» խմբակցության ղեկավար Լևոն Զուրաբյանը։


Հարցին, թե քառյակի օրակարգը դեռ ուժի մե՞ջ է, և թեժ աշուն դեռ կլինի՞, ՀԱԿ պատգամավորը հարցով պատասխանեց. «Իսկ ի՞նչ է փոխվել, դուք ամեն օր, ի՞նչ է, պետք է լսեք, որ ուժի մեջ է, որ հավատա՞ք, որ ուժի մեջ է»։


Զուրաբյանը նշեց, որ եթե անհանգստությունն է պատճառը, ապա ինքը կարող է շնորհակալություն հայտնել և ասել. «Մի քիչ վստահ եղեք մեր բռնած գործի վրա»։


ՀԱԿ պատգամավորը հայտարարել էր, որ իրենց համար ի սկզբանե էլ պարզ է եղել, որ կառավարությունը դատապարտված է տապալման։ Հարցին, որ քառյակի որոշ ներկայացուցիչների համար ժամանակ էր պետք դա հասկանալու, արդյո՞ք այդ ուժերի համար դեռ ժամանակ է պետք, Զուրաբյանը պատասխանեց. «Կարծում եմ՝ բոլորի համար էլ պարզ է և հասկանում են, որ հանրապետական ռեժիմն այլևս սպառված է, և ոչ մի բարելավում նրանից սպասել հնարավոր չէ»։


Լևոն Զուրաբյանը տեղեկացրեց, որ քառյակի առաջիկա հանդիպումը կլինի վաղը։ «Քառյակի համագործակցությունն այսօր էլի տեսաք, այն հայտարարությունը, ինչ-որ արեցի արտագաղթի վերաբերյալ, քառյակի մոտեցումն է»։


Ընդդիմադիր պատգամավորը նշեց, որ քառյակի վաղվա օրակարգը դեռ ձևավորված չէ. «Քառյակի օրակարգը ձևավորում է հետևյալ կերպ, բոլոր ուժերն անում են իրենց առաջարկները օրակարգի վերաբերյալ, ձևավորում է օրակարգ, և այդ օրակարգով սկսվում են քննարկումները»։


Իսկ թե իրենց առաջարկը ո՞րն է լինելու, ՀԱԿ պատգամավորը նշեց, որ այն ժամկետը, որ տվել էին իշխանություններին 12 կետերի հարցով, արդեն ավարտվում է։ «Ակնհայտ է, որ մեր պահանջները կամ ավելի ճիշտ է ասել՝ ժողովրդի պահանջներն իրագործված չեն և պետք է արդեն մտածել մեր հետագա քայլերի մասին։ Տեխնիկապես, իհարկե, մինչև սեպտեմբերի 30-ը հետագա քայլերի վերաբերյալ մենք իրավունք էլ չունենք ինչ-որ բան ասելու, որովհետև պետք է պահել ժամկետը։ Տեսականորեն չի բացառվում, որ վերջին երեք օրվա ընթացքում կառավարությունը ղռռալով անցկացնի օրենքներ և ընդունի որոշումներ, որ պահանջել ենք, բայց սա, իհարկե, տեսականորեն, դրա համար եմ ասում, որ պետք է ժամկետը պահվի, որից հետո կորոշենք մեր անելիքները, որից հետո արդեն ժամանակը կլինի նաև հանրահավաքի օրվա նշանակման համար»,-եզրափակեց նա։