Ոչ իշխանական ուժերը քննարկել են սահմանադրական բարեփոխումների հարցը և որոշել՝ հարգել միմյանց տեսակետները. Ա. Ռուստամյան

16:01 • 09.09.14

ԱԺ ոչ իշխանական չորս խմբակցությունները քննարկել են սահմանադրական բարեփոխումների հարցը. քառյակի նիստից հետո լրագրողներին տեղեկացրեց ԱԺ «Հայ Յեղափոխական Դաշնակցություն» խմբակցության ղեկավար Արմեն Ռուստամյանը, ով ընդգծեց, որ խմբակցություններից միայն ՀՅԴ-ն է կողմ այս բարեփոխումներին, և որոշում է ընդունվել, որ բոլորը պետք է հարգեն միմյանց տեսակետները:


Իսկ թե ինչու չկարողացան միասնական դիրքորոշման հանգել սահմանադրական բարեփոխումների հարցում, Ռուստամյանը պատասխանեց, որ այդ ուժերը՝ նկատի ունենալով ԲՀԿ-ին ու «Ժառանգությանը», նպատակահարմար չեն գտել այսօր այդ փոփոխությունները կատարել, չնայած կարող էին միանալ ՀՅԴ-ին։


«Մենք փոխանակեցինք մեր տեսակետները սահմանադրական փոփոխությունների հարցով, արձանագրվեց, որ ամեն մեկը պետք է հարգի մյուսի տեսակետը։ Այս պարագայում տեսակետները քառյակում տարբերվում են: ՀՅԴ-ն կողմ է սահմանադրական փոփոխություններին, իսկ մնացած երեք ուժերը՝ այս կամ այն պատճառաբանություններով, նպատակահարմար չեն համարում սահմանադրական փոփոխությունների անցկացումը»,- ասաց նա:


Ռուստամյանը հայտնեց, որ նիստի ընթացքում քննարկվել են նաև այլ հարցեր և որոշել են նաև «Նաիրիտի» հարցով ժամանակավոր հանձնաժողով ստեղծելու առաջարկ ներկայացնել ԱԺ, խորհրդարանի ղեկավար Գալուստ Սահակյանին նամակ փոխանցել՝ արտագաղթի կասեցման նախաձեռնության վերաբերյալ՝ պահանջով հրավիրել խորհրդարանական լսումներ:


Բացի այդ, ոչ իշխանական ուժերը 12 կետերի նախնական ամփոփում են արել: «Վերջնական ամփոփումը թողեցինք հետագայում, որովհետև ժամանակը դեռ չի սպառվել: Տարբեր քաղաքական ուժեր իրենց գնահատումները ներկայացրին, հիմա որոշեցինք նախնական ամփոփել կուսակցություններում, որ կարողանանք միասնական տեսակետի հանգել, իսկ վերջնական ամփոփումը կկատարենք ավելի ուշ»,- նշեց նա։


Ինչ վերաբերում է առաջիկա հանրահավաքին, ապա ըստ նրա, քառյակը շուտով կհստակեցնի նաև միասնական հանրահավաքի օրը: «Հանրահավաքի հարցում մեր պայմանավորվածությունը ուժի մեջ է։ Հանրահավաք կանցկացվի, պարզապես ժամկետների տարբեր առաջարկներ են եղել, որոնց քննարկումը տեղի կունենա կուսակցությունների միջև ու ապագայում կհրապարակենք նաև հանրահավաքի օրը»,- նշեց Ռուստամյանը: