Հովհաննես Սահակյանը հրաժարվում է ԱԺ էթիկայի հանձնաժողովի նախագահի պաշտոնից

21:22 • 09.09.14

Ազգային ժողովի էթիկայի հանձնաժողովի նախագահ Հովհաննես Սահակյանը, ով նաև պետաիրավական հարցերի մշտական հանձնաժողովի նախագահն է, Tert.am-ի հետ զրույցում ասաց, որ քանի որ պետաիրավական հարցերի հանձնաժողովի աշխատանքները ծանրաբեռնված են, և առաջիկայում էլ մի շարք նախագծեր են գալու, որոնք շատ կարևոր են և աշխատատար, ապա իր կարծիքով` ժամանակի խնդիր է առաջանալու:

 

«Այդ իսկ պատճառով Ազգային ժողովի նախագահին ներկայացրեցի իրավիճակը. նա քաջատեղյակ է հանձնաժողովի աշխատանքերին: Մեր խմբակցության ղեկավարի հետ ևս խոսել եմ, և եկանք համատեղ եզրահանգման: ԱԺ նախագահը չմերժեց իմ առաջարկը, այն է՝ մաս չկազմել կամ անդամ չլինել էթիկայի հարցերով հանձնաժողովին»,-ասաց Հովհաննես Սահակյանը:

 

Վերջինս ասաց նաև, թե Ազգային ժողովի նախագահին առաջարկել է ՀՀԿ-ական պատգամավոր Արփինե Հովհաննիսյանի թեկնածությունը՝ հանձնաժողովի նախագահի պաշտոնում:


«Այդ հարցը գտնվում է մեր խմբակցության տիրույթում և շուտով քննարկվի»,-տեղեկացրեց պատգամավորը: