Հայ աստղաֆիզիկոսն ու բրիտանացի գիտնականը տիեզերքում մարդու 50 տարիների մասին գիրք են ներկայացրել

Հայ աստղաֆիզիկոս Գարիկ Իսրայելյանը բրիտանացի գիտնական, պրոֆեսոր Սթիվեն Հոքինգի հետ ներկայացրել է «Սթարմուս. Մարդու 50 տարիները տիեզերքում» աշխատությունը, որը նվիրված է 2011 թվականին անցկացված «Սթարմուս»-ի առաջին գիտական փառատոնին: Այս մասին հայտնում է «Արմենպրես»-ը։ 

Գրքի գլխավոր խմբագիրներն են Գարիկ Իսրայելյանն ու Բրայան Մայը, գործադիր խմբագիրը` Դևիդ Էիչերը: Աշխատության առաջաբանի հեղինակը Սթիվեն Հոքինգն է, ով ընդգծել է գրքի պատմական նշանակությունը:

«Սա պատմական փաստաթուղթ է, քանի որ այն պարունակում է Նեիլ Արմսթրոնգի վերջին դասախոսությունը և «Սայուզ»-ի ու «Ապոլլո»-ի տիեզերագնացների խոսակցությունները»,- ասել է Հոքինգը` հույս հայտնելով, որ իր մասնակցությունը կունենա նաև երկրորդ գրքի հրատարակման մեջ: 

«Սթարմուս» գիտական երկրորդ փառատոնը Կանարյան կղզիների և Տեներիֆեի խորհրդարանի աջակցությամբ կկայանա սեպտեմբերի 22-27-ը: Այն կկրի «Սկիզբը. ժամակակակից տիեզերքի ստեղծումը» խորագիրը: