Իսրայելում հիվանդը ջութակ է նվագել գլխուղեղի վիրահատության ընթացքում (տեսանյութ)

Լիտվացի ջութակահարուհի Նաոմի Էլիշուվն Իսրայելում գլխուղեղի վիրահատության է ենթարկվել, որի ընթացքում ջութակով նվագել է Մոցարտի ստեղծագործությունները, գրում է РИА Новости-ն։

Ջութակահարուհին 20 տարի տառապել է ձեռքերի դողից (տրեմոր), ինչը բարդացրել է նրա կյանքը և խոչընդոտել ջութակ նվագելուն։ Էլիշուվը վիրահատվել է Իսրայելում, որտեղ տեղային անզգայնացմամբ նրա գլխուղեղում փոխպատվաստվել է 1.3 մմ երկարությամբ էլեկտրաստիմուլյատոր։

«Ստիմուլյատորի տեղադրման համար մեզ պահանջվել է հիվանդի ակտիվ աջակցությունը, այդ պատճառով էլ մենք խնդրեցինք նրան ջութակ նվագել։ Երբ մենք ակտիվացրինք էլեկտրոդն անհրաժեշտ տեղում, Էլիշուվը սկսեց նվագել Մոցարտ, սակայն արդեն առանց տրեմորի»,- պատմել է առաջատար նեյրովիրաբույժ Իզչակ Ֆրիդը։

Բժիշկների խոսքերով՝ ջութակահարուհին կրկին կարող է ելույթ ունենալ հանդիսատեսի առաջ։