Ռուսաստանը կարող է արգելել մեքենաների ներմուծումը` ի պատասխան Արևմուտքի պատժամիջոցների
Ռուսաստանի Դաշնության նախագահի օգնական Անդրեյ Բելոուսովը հայտարարել է, որ Արևմուտքի պատժամիջոցների պատասխան փաթեթն արդեն պատրաստ է, փոխանցում է РИА Новости-ն:
Պատասխան պատժամիջոցների 2-րդ փաթեթը ենթադրում է ավտոմեքենաների և թեթև արդյունաբերության որոշ ապրանքների ներմուծման սահմանափակում:
«Մենք ունենք մի շարք ոչ գյուղատնտեսական ապրանքներ, որտեղ մեր, նախևառաջ, եվրոպական գործընկերներն ավելի շատ են կախված Ռուսաստանից, քան Ռուսաստանը նրանցից: Դա վերաբերում է, օրինակ, մեքենաների ներմուծմանը, առաջին հերթին՝ օգտագործված մեքենաների, դա վերաբերում է թեթև արդյունաբերության որոշ տեսակի ապրանքներին, որոնք մենք արդեն ինքներս կարող ենք արտադրել: Ոչ բոլոր, սակայն հագուստի որոշակի տեսակներ»,- ասել է Բելոուսովը:
Նա նշել է, որ Տնտեսական զարգացման նախարարությունն արդեն պատրաստել է այդ ապրանքների ցանկը: «Ես հույս ունեմ, որ առողջ դատողությունը կգերազանցի, և մենք ստիպված չենք լինի պատասխան միջոցներ սահմանել»,- բացատրել է նախագահի օգնականը:
Ավելի վաղ հաղորդվել է, որ Եվրամիությունը Ռուսաստանի դեմ նոր պատժամիջոցներ կսահմանի սեպտեմբերի 12-ին:










