Պորոշենկոն կոչ է արել Եվրամիությանը մտածել քաղաքավարության մասին

15:58 • 12.09.14

Ուկրաինայի նախագահ Պյոտր Պորոշենկոն հայտարարել է, որ երկիրը բավականաչափ բաներ է արել Եվրամիությանն անդամակցելու հեռանկար ստանալու համար, և դա մերժելն «ուղղակի անքաղաքավարություն կլիներ», գրում է lenta.ru-ն:

 

Պորոշենկոն ընդգծել է, որ «ուկրաինացիները հանձնել են իրենց կյանքի ամենադժվար քննություններից մեկը՝ Եվրամիության անդամ դառնալու համար»: «Երբեք Ուկրաինան չի ունեցել աշխարհում և Եվրոպայում աջակցության նման մակարդակ, և ուղղակի անքաղաքավարի կլիներ մեզ չտրամադրել անդամակցության հեռանկար»,- ընդգծել է նա:

 

Պորոշենկոյի խոսքով՝ ԵՄ-ի հետ ասոցացման համաձայնագրի հիմնական դրույթներն են կոռուպցիայի դեմ պայքարը, բարենպաստ ներդրումային մթնոլորտի ստեղծումը և իրավունքի գերակայության ապահովումը: Այդ առնչությամբ նա խոստացել է, որ հենց այդ հարցերը կդառնան առաջնահերթ խորհրդարանական ընտրություններից անմիջապես հետո, որոնք Ուկրաինայում անցկացվելու են 2014 թվականի հոկտեմբերի 26-ին: