Տորոնտոյի սկանդալային քաղաքապետի մոտ ուռուցք է հայտնաբերվել
Կանադական Տորոնտոյի քաղաքապետ Ռոբ Ֆորդը չի մասնակցի քաղաքապետի առաջիկա ընտրություններին՝ լուրջ հիվանդության պատճառով. նրա մոտ ուռուցք է հայտնաբերվել, հայտնում է ԻՏԱՌ ՏԱՍՍ գործակալությունը:
Ներկայում Ֆորդը գտնվում է հիվանդանոցում, և բժիշկները նրան վիրահատության են պատրաստում:
Ռոբ Ֆորդի փոխարեն ընտրություններին կգնա նրա ավագ եղբայրը՝ Դագ Ֆորդը:
«Ես խնդրեցի նրան ավարտել այն, ինչ սկսել ենք: Մենք նրա կարիքը շատ ունենք, չէ՞ որ չենք կարող նահանջել»,- ասել է քաղաքապետը:
Քաղաքապետի ընտրությունները նշանակված են հոկտեմբերի 27-ին:
2013-ի մայիսին Toronto Star թերթը գրել էր, որ առկա է տեսանյութ, որտեղ Ռոբ Ֆորդը թմրանյութ է ծխում: Չնայած սկանդալին՝ նա հրաժարվել էր հրաժարական տալ՝ հերքելով նման ձայնագրությունը: Հետագայում խոստովանել էր՝ նշելով, որ եղել է հարբած վիճակում և հնարավոր է, որ ծխել է:










