Հայաստանն առաջնությունում աշխարհի 2 չեմպիոն ունեցող միակ երկիրն է, ինչը ֆանտաստիկ արդյունք է. Կարեն Գիլոյան
Ուզբեկստանի մայրաքաղաք Տաշքենդում ավարտված հունահռոմեական ոճի ըմբշամարտի աշխարհի առաջնությանը Հայաստանի հավաքականը ցույց տվեց ֆանտաստիկ արդյունք՝ աշխարհի երկու չեմպիոն՝ Արսեն Ջուլֆալակյան և Արթուր Ալեքսանյան: Tert.am-ի հետ զրույցում նման գնահատական հնչեցրեց Ըմբշամարտի ֆեդերացիայի մամուլի քարտուղար Կարեն Գիլոյանը։
-Կարե՛ն, երկու աշխարհի չեմպիոն՝ մեկ առաջնությունում. ի՞նչ արդյունք է սա, բացի նրանից, որ բոլորը ոգևորված ու հիացած են մեր մարզիկների ելույթներով:
- Ֆանտաստիկ արդյունք է: 8 քաշային կարգերում է աշխարհի չեմպիոնի տիտղոսը վիճարկվել , 8 հավաքածու է խաղարկվել, և միակ երկիրը, որ երկու չեմպիոն ունի, Հայաստանն է: Համեմատության համար նշեմ, որ մեկական չեմպիոն ունեն Ռուսաստանը, Իրանը, Սերբիան, Հունգարիան,Ֆրանսիան:
-Շատ է խոսվում սպորտի տարբեր մարզաձևերի առումով, թե ինչ վիճակում են դպրոցները, որ չկա ֆինանսավորում , մարզիչներն արտագաղթում են: Ի՞նչ վիճակում են ըմբշամարտի դպրոցները:
-Ըմբշամարտի դպրոցներն ամենալավ վիճակում են, կամ՝ ամենալավերից մեկը: Ֆեդերացիայի նախագահ Սամվել Կարապետյանը ոչ մի միջոց չի խնայում, տարեկան մոտ 1 միլիոն 200 հազար դոլարի չափ ներդրումներ է անում: Ամեն ինչի՝ խմբակներ, մարզիկներ, մարզիչներ, հավաքականներ, դեղորայք, մրցաշարեր, ամեն ինչի վրա այդ գումարները ծախսվել են, և դրա համար էլ նման արդյունքներ են գրանցվում:Եվ այս գումարից մի մասն ուղղվում է խրախուսական համակարգերին, վերջապես, պարգևատրումներին, որպեսզի մարզիկներին տանք, որ լուրջ հաջողության հասնելու դեպքում խթան ունենան:
-Հենց այդ մասին էի ուզում հարցնել, որ Հայաստանի պետական դրոշը ծածանելն անշուշտ ոգևորիչ է, բայց, այսուհանդերձ ֆինանսական ինչ…
-Այսուհանդերձ, Հայաստանի կառավարությունն իր կողմից ունի սահմանած պատվովճար. Հայաստանի ազգային օլիմպիական կոմիտեն՝ իր, Հայաստանի ըմբշամարտի ֆեդերացիան էլ ունի իր պարգևավճարը սահմանած: Վստահ եմ, որ աշխարհի չեմպիոնները կդառնան բավականին ունևոր մարդիկ: Այսինքն՝ մինչև հիմա, ով աշխարհի չեմպիոն է դարձել, պետական պարգևը ստացել է, Օլիմպիական կոմիտեի կողմից ստացել է բնակարան, դա և՛ Նազիկ Ավդալյանին է վերաբերում, և՛ Տիգրան Մարտիրոսյանին, անցած տարվա չեմպիոն Դավիթ Սաֆարյանին նաև: Ֆեդերացիան էլ իր կողմից կլորիկ գումար կտա, որը հիմա չեմ կարող հնչեցնել: Եվ սա շատ կարևոր է, այդ վերաբերմունք ցույց տալը, որ հետագայում մատաղ սերունդը նայի, իմանա, որ եթե ինքը կարողանում է իր ազգի պատիվը բարձր պահել, ուրեմն ազգն էլ իր պատիվը բարձր կպահի:
-Բոլոր մարզերում ըմբշամարտի դպրոցներ ունե՞նք:
- Ոչ բոլոր, ՀԱՕԿ-ը հիմա ծրագիր է մշակում, պատրաստվում է Սյունիքի մարզում նոր դպրոց բացել, ինչպես նաև՝ այլ շրջաններում ու Երևանում՝ Դավիթաշեն թաղամասում մեծ համալիր է կառուցվում օլիմպիական հավաքականների, որտեղ ըմբշամարտին դահլիճ է տրամադրվելու, և դա հնարավորություն է տալիս մեր հավաքականներին լավագույնս անցկացնել ուսումնամարզական հավաքներ:
-Իսկ այս տարիների ընթացքում, ըմբշամարտով զբաղվող երեխաների թիվը ավելացե՞լ է, պակասե՞լ է:
-Անկասկած, մարզվողների թիվն ավելացել է, մարզվողների որակն էլ է բարձրացել, ու եթե կար մի ժամանակ, երբ յուրաքանչյուր մեդալը մեծ հաջողություն կհամարեինք, ապա հիմա, եթե աշխարհի չեմպիոն չենք ունենում, մի փոքր տխուր ենք լինում, ընդգծում ենք, որ այս տարին ձախողված է:










