Տաղանդը մերն է, մնացածը թող ուրիշ տեղ լինի. Շիրակի մարզպետը՝ Գյումրու մարզադպրոցների մասին

19:41 • 17.09.14

Հայազգի բազմաթիվ չեմպիոնների ծննդավայր Շիրակի մարզի Գյումրի քաղաքում մարզադպրոցների պայմանները որևէ կերպ չեն նմանվում ժամանակակից չափանիշներին համապատասխան մարզադպրոցներին, և դա նաև մարզային իշխանություններին է մտահոգում:

 

Նշենք, որ հենց Գյումրիում էր մարզվել ընբշամարտի աշխարհի չեմպիոն Արթուր Ալեքսանյանը, ում մարզադպրոցում նույնպես վատ պայմաններ են: «Արթուրի մարզադպրոցի հետ կապված խոսակցություն ունեցել ենք, բոլոր մարզադպրոցներում էլ խնդիր կա: Դրա հետ կապված՝ մենք խնդիրը դրել ենք, որն արդեն քննարկման ընթացքի մեջ է»,-Tert.am-ի հետ զրույցում ասաց Շիրակի մարզպետ Ֆելիքս Ցոլակյանը:

 

Վերջինիս փոխանցմամբ՝ ՀՀ սպորտի և երիտասարդության հարցերի նախարարը պետք է Գյումրի գնա, իրենք միասին կայցելեն, կծանոթանան իրավիճակին և քայլեր կձեռնարկեն:

 

Իսկ թե ինչի արդյունք է, որ Գյումրին այդքան շատ չեմպիոններ է տալիս, մարզպետը պատասխանեց. «Հողից է, ջրից է, արևից է: Ի սկզբանե գյումրեցիներն այդ երկու մարզաձևում շատ ակտիվ են եղել, այստեղ տաղանդ կա, տաղանդը մերն է, մնացածը թող ուրիշ տեղերում լինի»: