Մոտ 200 հնդիկ ճաղատացել է՝ սատկած կապիկի պատճառով

18:03 • 18.09.14

Հնդկաստանի Դակչա գյուղի մոտ 200 բնակիչ ճաղատացել է՝ տեղի տաճարում ապրող կապիկի սատկելու պատճառով, գրում է lenta.ru-ն` BBC News-ին հղումով:

 

Մոտ 700 հոգի էլ սափրել է մորուքը: Մարդիկ այդ քայլին են դիմել, քանի որ գյուղի ծերունիները հայտնել են, որ կապիկի մահը գյուղում լավ նշան չէ:

 

Մտավախություն ունենալով, որ կենդանին կարող է դժբախտություն բերել գյուղին՝ բնակիչները թաղման արարողություն են կազմակերպել բոլոր հնդկական ծիսակատարություններով: Կապիկի մարմինն այրել են, իսկ մոխիրը լցրել Գանգես գետը:

 

Կապիկը համարվում է սուրբ կենդանի:

 

Կապկանման Հանուման աստվածությունը հինդուիզմում համարվում է ամենահայտնիներից մեկը: Նրան պաշտում են որպես գյուղական կյանքի պահապան և գիտությունների հովանավոր: