ՀՀ ԱԺ նախագահը հանդիպել է «Հայաստան-Սփյուռք» հինգերորդ համաժողովի մասնակիցների հետ

19:47 • 19.09.14

Սեպտեմբերի 19-ին ՀՀ ԱԺ նախագահ Գալուստ Սահակյանը հանդիպել է «Հայաստան-Սփյուռք» հինգերորդ համաժողովի մասնակիցների հետ: Ինչպես հայտնում են ՀՀ Ազգային ժողովից՝ հանդիպմանը ներկա էին ՀՀ ԱԺ պատգամավորներ, ՀՀ Սփյուռքի նախարար Հրանուշ Հակոբյանը և աշխարհի տարբեր պետություններից համաժողովի ժամանած սփյուռքահայեր:

 

Գալուստ Սահակյանը ողջունել է համաժողովի մասնակիցներին և նախապես շնորհավորել Հայաստանի Հանրապետության Անկախության տոնի առթիվ:


ՀՀ ԱԺ նախագահի խոսքով՝ համայն հայությունը միավորվել է մեկ գաղափարի շուրջ՝ դատապարտել հայության դեմ կատարված ոճրագործությունը, հասնել ցեղասպանության ճանաչմանը մարդկության կողմից, քանի որ ցեղասպանությունը ոչ միայն հայ ժողովրդի խնդիրն է, այլև միջազգային հանրության:

 

ՀՀ ԱԺ նախագահը հույս է հայտնել, որ 2015 թվականին Երևանում Մեծ եղեռնի հարյուրամյա տարելիցին նվիրված միջոցառումներին կմասնակցեն ոչ միայն հայեր, այլև՝ Հայոց ցեղասպանությունը դատապարտող օտարազգիներ: Մտքերի փոխանակության ընթացքում խորհրդարանականները և համաժողովի մասնակիցները զրուցել են և բարեմաղթանքներ հղել միմյանց: Այնուհետև հյուրերը ՀՀ ԱԺ նախագահ Գալուստ Սահակյանի և պատգամավորների հետ շրջել են խորհրդարանում, լուսանկարվել ԱԺ նիստերի դահլիճում: