Լոնդոնն իր խոստումներով խաբել է Մեծ Բրիտանիայի միասնության կողմնակիցներին. Շոտլանդիայի վարչապետ
Շոտլանդիայի վարչապետ Ալեքս Սալմոնդը Sky News հեռուստաալիքին տված հարցազրույցում հայտարարել է, որ Միացյալ Թագավորությունից երկրի անկախանալուն դեմ քվեարկած մարդիկ խաբվել են շոտլանդական խորհրդարանին լրացուցիչ լիազորություններ տրամադրելու մասին Լոնդոնի խոստումներով, հաղորդում է ИТАР-ТАСС-ը:
Նրա խոսքով՝ անկախությանը դեմ քվեարկած մարդիկ վիրավորված են, որ Մեծ Բրիտանիայի առաջատար երեք քաղաքական կուսակցությունների առաջնորդները՝ Դևիդ Քեմերոնը, Նիկ Քլեգը և Էդ Միլիբենդը, ովքեր նոր լիազորություններ են խոստացել Շոտլանդիայի խորհրդարանին, այժմ հրաժարվել են դրանցից:
Սալմոնդը հավելել է, որ Քեմերոնի և Միլիբենդի միջև որոշ տարաձայնություններ կան՝ լիազորությունները փոխանցելու ժամանակացույցի վերաբերյալ:
Միևնույն ժամանակ «Mail on Sunday» շաբաթաթերթն այսօր հրապարակել է Մեծ Բրիտանիայի վարչապետ Դևիդ Քեմերոնի հեղինակային հոդվածը, որտեղ ասվում է, որ Շոտլանդիայի խորհրդարանին նոր լիազորություններ տրամադրող օրինագիծը կհայտնվի հաջորդ տարվա հունվարին:










