Ամբողջ պատմությունը սկզբից մինչև վերջ օրիգինալ է. «Սուպեր մամա» ֆիլմի դերասանները՝ պրեմիերայից առաջ

«Սուպեր մամա» ֆիլմի պրեմիերայից առաջ այսօր Մոսկվա կինոթատրոնում ֆիլմի գլխավոր դերասաններն ու հեղինակները լրագրողներին ֆիլմի մասին որոշ մանրամասներ ներկայացրին:

Գլխավոր դերակատար և սցենարի համահեղինակ Հայկ Մարությանի խոսքով՝ ֆիլմն իր մեջ պարունակում է դրամայի տարրեր, կա նաև սիրո պատմություն: Այն պատրաստվել է մոտ մեկ տարի՝ մտահղացումից սկսած մինչև ավարտը:

«Բյուջեն կազմում է մոտ 250 հազար ԱՄՆ դոլար: Իսկ ֆիլմի մեսիջը՝ հումորի միջոցով տալ ինչ-որ մի պրոբլեմի լուծում: Չեմ ուզում ավելի բացել փակագծերը»,-ասաց նա և ավելացրեց. «Քանի որ նաև սցենարի համահեղինակն եմ, ասեմ, որ ֆիլմը կապ չունի ոչ մի ամերիկյան կամ եվրոպական ֆիլմի հետ: Ամբողջ պատմությունը սկզբից մինչև վերջ օրիգինալ է, նման չէ իմ նշած հայտնի ֆիլմերին»:

Հայկ Մարությանի փոխանցմամբ՝ քառասուն օրվա ընթացքում տեղի է ունեցել 25 նկարահանում, ֆիլմը Հայաստանում է նկարահանված, հիմնականում՝ Դիլիջանում: Սցենարի հեղինակն է Վարդան Զադոյանը:

Հարցին, թե ինչու ֆիլմում դեր չունի նաև Մկոն, Հայկ Մարությանը պատասխանեց. «Մեր ֆիլմում բոլոր դերերը բաժանված են ըստ դերասանների, կոնկրետ Մկոյին համապատասխան դեր չկար այս ֆիլմում»:

Անդրադառնալով Գարիկ Պապոյանի դերին՝ Հայկ Մարությանը նշեց. «Մենք գտել ենք, որ այս դերը շատ լավ կարող է խաղալ նաև Գարիկը: Շատ լավ է ստացվել Գարիկի դերը: Բոլորը խաղացել են շատ լավ»:

Իր հերթին Գարիկ Պապոյանն ասաց. «Սա կարող էի դիտել որպես հանդիսատես և ուրախանալ, բայց ստացա հնարավորություն նաև խաղալու: Այս անգամ ինձ բաժին է ընկել կինոյի չար դերը: Ինձ համար սա, կարելի է ասել, ևս մեկ դպրոց էր, երբեք չես կարող ասել, որ այլևս սովորելու բան չկա, միշտ էլ կարելի է զրոյից սկսել և սովորել ինչ-որ բան»:

Ապագայի ծրագրերի մասին էլ նա ավելացրեց. «Ապագա ծրագրերի մասին ինչ պիտի ասեմ, էս ֆիլմի հետ չի առնչվում, բայց ֆիլմը տվեց մեծ ոգևորություն: Մեծ հաճույքով կընդունեմ այլ առաջարկներ»:

Ֆիլմում ընդգրկված է նաև երեխայի դեր, որը կատարում է «Հրեշտակների դպրոց» սերիալի դերասան Արման Մարտիրոսյանը: «Հեշտ չի, բայց քանի որ լավ անձնակազմ է, ստացվել է»:

Երեխայի դերի մասին Հայկ Մարությանն ավելացրեց. «Արմանի տրամադրությունը միշտ լավ էր, միշտ պատրաստ էր: Ստացել ենք այն, ինչ հարյուր տոկոսով գրված էր սցենարում: Մեր ամենավտանգավոր կերպարը դարձավ մեր ապագա շահեկան կերպարը»:

Ֆիլմի ռեժիսորը Վահագն Խաչատրյանն է և Արման Մարությանը: