Երկու ավստրալացի ընկեր ֆուրգոնը վերածել են շարժական լվացքատան` օգնելու անօթևաններին` լվանալ իրենց հագուստը (լուսանկարներ)
Երկու հնարամիտ ընկեր հոյակապ միտք են հղացել անօթևաններին օգնելու համար: 20-ամյա տղաներն իրենց ֆուրգոնը վերափոխել են շարժական լվացքատան` հնարավորություն տալով անօթևան մարդկանց` անվտանգ լվանալ իրենց հագուստը:
Ինչպես ներկայացնում է Boredpanda.com-ը` Orange Sky Laundry նախագծի հեղինակներ Լուկաս Փաթչետը և Նիկոլաս Մարչեսին վերափոխությունն սկսել են` հին ֆուրգոն և գեներատոր ունենալով: Նվիրատվությունների օգնությամբ նրանց հաջողվել է երկու լվացի մեքենա և չորանոց տեղադրել մեքենայում, որը հնարավորություն է ընձեռել մեկ ժամում 20 կգ լվացք անել:
Նախագիծը մեկնարկել է հուլիսին և շարունակվում է մինչ այժմ: Ներկայում ֆուրգոնը շաբաթը 5 օր շրջում է ավստրալական Բրիսբեն քաղաքում: Եթե ծրագիրը հաջողությամբ պսակվի, այն լայնամասշտաբ կազմակերպության կվերածվի Ավստրալիայով մեկ:















