Իհարկե սա քաղաքական որոշում էր, բայց ես նաև ունեմ աշխատանքային փորձ. Վայոց ձորի նորանշանակ մարզպետ
Կառավարության որոշմամբ այսօր Վայոց ձորի մարզպետ նշանակված Հարություն Սարգսյանը, ով մինչ այդ Վայքի քաղաքապետն էր, լրագրողների հետ զրույցում, պատասխանելով հարցին, թե իր որ արժանիքների համար է նշանակվել մարզպետի պաշտոնում, ասաց՝ առաջին հերթին աշխատանքային փորձի:
«Իհարկե սա քաղաքական որոշում էր, բայց նաև ես ունեմ աշխատանքային փորձ, կենսագրություն, տիրապետում եմ մարզի ընդհանուր բոլոր խնդիրներին»,-ասաց նա:
Դիտարկմանը, թե երբ Կառավարության նիստին վարչապետն ասաց, որ նա պետք է արդարացնի Կառավարության և Նախագահի հույսերը, միգուցե նկատի ուներ կուսակցակա՞ն շահերը, նորանշանակ մարզպետը պատասխանեց. «Ես չգիտեմ՝ դուք ինչ նկատի ունեք կուսակցության շահեր ասելով, ինչո՞ւ չէ նաև կուսակցության շահերը, բայց առաջին հերթին ժողովրդի հետ աշխատելը: Ես ինքս Վայքից եմ, ապրում եմ էնտեղ ու ապրելու եմ ու ժողովրդի հետ հարաբերվելու եմ այնպես, ինչպես հարաբերվում էի քաղաքապետ եղած ժամանակ»։
Հարցին, թե ի՞նչ է անելու նա մարզում, որը նախկին մարզպետը չէր անում, կամ ինչն է վատ արել, պատասխանեց. «Նախկին մարզպետը վատ չի արել, իր իրավունքներն ու պարտականությունները ունի մարզպետը, նա ընդամենը կատարել է իր պարտականությունները, որևիցե առանձնահատուկ խնդիր դրված չէ»:
Նորանշանակ մարզպետը չկարողացավ պատասխանել հարցին, թե ինչով է պայմանավորված մարզպետի փոփոխությունը:
«Ես պատկերացնում եմ դժվարությունները, որովհետև փոխմարզպետ էլ եմ եղել, բայց պետք է աշխատել։ Ես այդ դժվարությունը վերցրել եմ, աշխատելու եմ թափանցիկ»,-ասաց նա:
Ինչ վերաբերում է մարզում առկա խնդիրներին, Հարություն Սարգսյանը հորդորեց իրեն հարցնել Վայք քաղաքի մասին, քանի որ դեռևս չի ծանոթացել մարզի խնդիրներին:










