Ադրբեջանում ընդդիմադիր ակտիվիստ է ձերբակալվել
Ադրբեջանում դարձյալ ընդդիմադիր ակտիվիստ է ձերբակալվել:
Ինչպես տեղեկացնում է contact.az-ը՝ Turan գործակալությանը հղումով, Նախիջևանում ձերբակալվել է ընդդիմադիր ակտիվիստ, «Ազգային ճակատ» կուսակցության շրջանային բաժնի ղեկավար Հիջրան Գասիմովը:
«Ազգային ճակատ» կուսակցության Նախիջևանի կազմակերպության ղեկավար Յաշար Բագիրսոյը տեղեկացրել է, որ Գասիմովին նստեցրել են մեքենան ու տարել:
Նրա գտնվելու վայրը հայտնի չէ:
Ոստիկանությունը տեղեկություններ չի հաղորդում նրա ձերբակալության պատճառների մասին, և հայտնի չէ, թե նա ինչի համար է մեղադրվում:
Հիշեցնենք, որ Ադրբեջանը վերջին ամիսներին դարձյալ միջազգային հանրության ուշադրության կենտրոնում է հայտնվել՝ երկրում քաղբանտարկյալների թվի աճի և «այլախոհներին» ճնշումների ենթարկելու դեպքերի առնչությամբ:
Ըստ իրավապաշտպանների ներկայացրած տվյալների՝ Ադրբեջանում քաղբանտարկյալների թիվն անցնում է 100-ը:










