Նոր ծրագիր՝ ՏԻՄ ծառայություններում կոռուպցիոն ռիսկերը նվազեցնելու նպատակով
Հայաստանյան տեղական ինքնակառավարման մարմիններն այսօր հաճախ չեն կարողանում ապահովել որակյալ ծառայությունների մատուցում՝ պատճառաբանելով բյուջետային ֆինանսավորման անբավարար մակարդակով, աշխատակիցների ցածր աշխատավարձն ու բնակելի ֆոնդերի մաշվածությունը: Մատուցվող ծառայությունների որակը կարելի է բարձրացնել՝ ներդնելով ծառայությունների կառավարման էլեկտրոնային համակարգ, որը կնվազեցին կոռուպցիոն ռիսկերը. այս մասին այսօր ՄԱԿ-ի հայաստանյան գրասենյակում կոռուպցիայի դեմ պայքարի միջազգային օրվա կապակցությամբ կայացած միջոցառմանը հայտարարեց Համայնքային զարգացման նորարարական կենտրոնի նախագահ Կարեն Երզնկյանը:
«Նախագիծն ուղղված կլինի պատվիրատու-մատակարար հարաբերությունների արդյունավետ կարգավորմանը, բնակիչների հետ հետադարձ կապի ստեղծմանը»,-ասաց նա՝ ավելացնելով, որ նախագծի նպատակն է ՏԻՄ ծառայությունների կառավարման ժամանակակից համակարգի ներդրման շնորհիվ բարձրացնել մատուցվող ծառայությունների որակն ու արդյունավետությունը:
Ներկայացված ծրագրով նախատեսվում է, որ տվյալ համատիրությունների բնակիչները կկարողանան առցանց գնահատել առանձին հայտի կատարման, ինչպես նաև ծառայությունների որակը: Համակարգում կներառվեն հաշվետվություններ ֆինանսական մուտքերի և ծախսերի վերաբերյալ, ինչպես նաև տեղեկատվություն կատարված աշխատանքի վերաբերյալ:
Համակարգը կունենա նաև ՏԻՄ կողմից մատուցված կոմունալ ծառայությունների դիմաց առցանց վճարումների իրականացման հնարավորություն:










