Քաղբանտարկյալ լինել չլինելու հանգամանքն ապացուցելը կոնկրետ անձի վրա է դրված, եթե հակառակը չի ապացուցում պետությունը. Արման Թաթոյան
ԱԺ «Հանրապետական» խմբակցության պատգամավոր Մարգարիտ Եսայանը «Հայաստանի Հանրապետության կողմից ԵԽԽՎ «Քաղաքական բանտարկյալի սահմանումը» թիվ 1900 բանաձևի կատարման վերաբերյալ» թեմայով հրավիրված խորհրդարանական լսումներին արդարադատության փոխնախարար Արման Թաթոյանից հետաքրքրվեց, թե համակարծի՞ք է պատգամավոր Ալեքսանդր Արզումանյանի արտահայտած այն մտքին, որ քաղաքական բանտարկյալ է այն անձը, ով իրեն հայտարարում է քաղաքական բանտարկյալ:
Մարգարիտ Եսայանը հստակեցրեց, որ անձամբ ինքը համաձայն չէ: «Ես պարոն Արզումանյանի կոնկրետ պատասխաններին չեմ անդրադառնա՝ ելնելով հարցի քննարկվող բնույթից և իմ իրավասության սահմաններից, բայց կարող եմ ասել, որ միջազգային չափանիշներով՝ կոնկրետ անձի վրա է դրվում ապացուցելու այդ հանգամանքը, եթե հակառակը չի ապացուցում պետությունը»,-ասաց նա:
Փոխնախարարը բացատրեց, որ անձի բերած հիմնավորումները պետք է հերքի պետությունը։ «Եթե պետությունը համոզիչ կերպով չի կատարում, արդեն ապացուցվում է, որ այդպիսին է, բայց հստակ մեխանիզմ է պետք սրա համար»,-նշեց նա և տեղեկացրեց, թե, իհարկե, կոմիտեն ընդունում է, որ կան չարաշահման հնարավորություններ և ուստի իրավական չափանիշ է անհրաժեշտ:
Ժառանգության պատգամավոր Զարուհի Փոստանջյանը արդարադատության փոխնախարար Արման Թաթոյանից հետաքրքրվեց, թե ինչպես է գնահատում այսօր քաղբանտարկյալների վիճակը: «Այն, որ քաղբանտարկյալ են, հայտարարել են Շանթ Հարությունյանը, Վոլոդյա Ավետիսյանը և այլք, դուք ուսումնասիրություն արե՞լ եք, համադրություն ունե՞նք, թե ոչ»,-հարցրեց նա:
Արման Թաթոյանը պատասխանեց, որ չի կարող գնահատական տալ, քանի որ Հայաստանում չկա համապատասխան հոդվածներով որևէ վճիռ: «Իսկ կոմունիկացված գործերով գնահատական տալը ճիշտ չէ»,-ասաց նա և հավելեց, թե քաղբանտարկյալ լինելու հետ կապված չկա իրավական որոշում:










