Ադրբեջանում դատարանը 3 ակտիվիստի ճաղերի ետևում է թողել

10:10 • 11.12.14

Բաքվի վերաքննիչ դատարանը մերժել է Ընտրությունների մոնիթորինգի և ժողովրդավարություն ուսուցման կենտրոնի տնօրեն Անար Մամեդլիի և մի քանի այլ ակտիվիստների բողոքարկումը՝ նրանց բոլորին թողնելով ճաղերի ետևում, գրում է contact.az-ը։

 

Անար Մամեդլիի հետ բանտարկված են շարունակում մնալ ակտիվիստներ Բաշիր Սուլեյմանլին և Էլնուրա Մամեդովան։

 

Վերաքննիչ բողոքի քննմանը ներկա են եղել ԵՄ-ի առաքելության, ինչպես նաև Գերմանիայի, Ֆրանսիայի, Մեծ Բրիտանիայի, Բելգիայի և Նիդեռլանդների դեսպանատների ներկայացուցիչներ։

 

Փաստաբան Ալիբաբա Ռզաևը հայտարարել է, որ ներկայացված մեղադրանքի հինգ հոդվածներով ամբաստանյալներից ոչ մեկի մեղքը չի ապացուցվել:

 

Փաստաբանը նշել է, որ շատ փաստեր վկայում են, որ այս դատական գործընթացը կրում է քաղաքական բնույթ։

 

Վերջին շրջանում Ադրբեջանում հաճախակիացել են լրագրողների, ակտիվիստների և իրավապաշտպանների նկատմամբ ճնշումներն ու հետապնդումները։