Կնոջ գեղեցկությունն ու երիտասարդ տեսքը կախված է նրա օգտագործած սննդից. սննդաբան

13:21 • 07.03.15

Դիետոլոգ-էնդոկրինոլոգ Հասմիկ Աբովյանը այսօր լրագրողների հետ զրույցում ընդգծեց, որ եթե կինն ուզում է երիտասարդ երևալ և պահպանել կազմվածքը, պետք է հետևի իր սննդակարգին: Ըստ նրա՝ այն ինչ այսօր պատրաստում են հայ կանայք, թեև շատ համեղ է, բայց միշտ չէ, որ օգտակար է:


«Հիպոկրատն ասել է՝ ուտելիքը պետք է լինի դեղորայք, իսկ դեղորայքը ուտելիք: Մեր մարմինը, մաշկը, մազերը, եղունգները կառուցվում են նրանից, թե ինչ ենք մենք ուտում: Եթե առողջ սնունդ են ուտում են, ուրեմն դրանք էլ առողջ կլինեն, իսկ գեղեցիկ է միայն առողջ կինը»,- ասաց նա:


Սննդաբանն ընդգծեց, որ ինչպես կնոջ, այնպես էլ ցանկացած մարդու ամենօրյա սննդակարգում պետք է պարտադիր տեղ գտնեն միրգն և բանջարեղենը, ընդեղենը, ծովամթերքը, լավ որակի և ճիշտ պատրաստված մսամթերքը:


«Պետք է հրաժարվել բարձր կալորիականություն ունեցող մթերքից: Հաճախ նույնիսկ կարևոր չէ՝ ինչ մթերք ես օգտագործում, որքան կարևոր է, թե ինչպես է պատրաստված»,- ասաց նա: