ВКонтакте սոցցանցում գումար գողանալու նպատակով տրոյական վիրուս է տարածվում. Կասպերսկու լաբորատորիա

Ռուսական ВКонтакте  սոցիալական ցանցի միջոցով տարածվում է Podec տրոյական վիրուսը, որի օգնությամբ չարագործները  գումարներ են գողանում Android օպերացիոն համակարգով աշխատող գաջեթների տերերից:

Ինչպես փոխանցում  է ТАСС-ը` այս մասին տեղեկացրել է «Կասպերսկու լաբորատորիան»: Հետազոտությունը ցույց է տվել, որ տրոյական վիրուսի տարածման համար հիմնական հարթակ է  ծառայում ВКонтакте սոցցանցը:

«Նոր վիրուսն առանձնանում է իր գործառույթներով. այն կարող է հաղորդագրություններ ուղարկել  կարճ համարներին` միևնույն ժամանակ ճիշտ պատասխանելով  ծառայության վճարի հաստատման հարցումներին, ինչպես նաև՝ բաժանորդին գրանցել վճարովի ծառայություններին` շրջանցելով այն մեխանիզմը, որով իրական օգտատիրոջը տարբերակում են ավտոմատ գործողություններ կատարող համակարգչային ծրագրից», - ասվում է Կասպերսկու լաբորատորիայի հաղորդագրության մեջ: