Շոտլանդիայում հաջողվել է լուսանկարել գիշերային ժամին լճի վրայով «սահող» երկնաքարը (լուսանկարներ, տեսանյութ)

Շոտլանդիայի Դրամնադրոչիտ շրջանում Ջոն Ալասդեյր ՄքԴոնալդը գիշերային ժամին կարողացել է լուսանկարել Լոխ Նես քաղցրահամ լճի արևմտյան ափի կողմով ընկնող երկնաքարը, որը մթության մեջ գեղեցիկ լուսարձակում է տվել, գրում է Daily Mail-ը:

Լուսանկարն արվել է Sony RX100 տեսախցիկով, որը հնարավորություն է տվել դանդաղեցված կադրով նկարել տեսարանը, որն էլ պատկերել է հետագիծը։

Ալասդեյրն ասել է, որ իսկապես զարմացել է, քանի որ ամբողջովին պատահական է հաջողացրել լուսանկարել տեսարանը:

Նշվում է, որ երկնաքարը հավանաբար ունեցել է բասկետբոլի գնդակի չափ, սակայն ամբողջովին այրվել և փոշիացել է՝ մտնելով Երկրի մթնոլորտ: Լճի ափին տեղակայված անվտանգության տեսախցիկները նկարել են, թե ինչպես է երկնաքարը մտնում մթնոլորտ և այրվում: 

Երկնաքարերը միջմոլորակային տարածությունից Երկրի վրա ընկնող երկաթային կամ քարային մարմիններ են։ Երկնաքարերի անկումն ուղեկցվում է լուսային, ձայնային և մեխանիկական երևույթներով: