«Ֆուկուսիմա-1» ատոմակայան ուղարկված ռոբոտը դադարեցրել է աշխատանքը 3 ժամ անց (լուսանկարներ, տեսանյութեր)

Ճապոնիայում 2011-ին տեղի ունեցած երկրաշարժի և ցունամիի հետևանքով վթարված «Ֆուկուսիմա-1» ատոմակայան ռոբոտ է ուղարկվել՝ ատոմակայանի ռեակտորներում և դրա շրջակայքում իրավիճակը տեսանկարահանելու համար, գրում է Daily Mail-ը:

Նշվում է, որ «Tokyo Electric Power» ընկերության անձնակազմին 2011-ին հաջողվել է զմռսել երկրորդ ռեակտորից Խաղաղ օվկիանոս թափվող չափազանց աղտոտված ջրի արտանետումները:

Այնուամենայնիվ, տարիներ անց այն մասին, թե ինչ իրավիճակ է տիրում ռեակտորի ներսում, ոչ ոք չգիտի: Այն համարվում է արգելված տարածք, այնտեղ այնքան բարձր է ճառագայթման մակարդակը, որ մարդկանց արգելված է ոտք դնել այնտեղ:

Ատոմակայանը շահագործումից հանելու համար ստեղծված Hitachi-GE միջուկային էներգետիկայի և միջազգային հետազոտությունների ինստիտուտը մշակել և ստեղծել է ռոբոտ, որը կարող է մինչև 10 ժամ աշխատել չափազանց բարձր միջուկային ճառագայթումների ներգործության տակ: 

Նշվում է, որ ռոբոտը, չնայած կանխատեսումներին, չի կարողացել դիմանալ 10 ժամ, և առաքելության մեկնարկից արդեն 3 ժամ անց ռոբոտի տեխնիկան թերացել է, և ճառագայթման ներգործության հետևանքով նկատվել են անսարքություններ: 

Չնայած դրան՝ ռոբոտը հասցրել է լուսանկարել և տեսանկարահանել ատոմակայանի ներսը և ուղարկել դրանք ուսումնասիրողներին: 

Լքված և անբնակ Ֆուկուսիմա ատոմակայանի շրջակայքի տեսանյութ, որը նկարահանվել է անօդաչույից