Հայաստանի հանդեպ հետաքրքրությունը համացանցում աննախադեպ աճել է. Սամվել Մարտիրոսյան

Հայաստանի հանդեպ հետաքրքրությունը համացանցում աննախադեպ աճել է. այս մասին այսօր մամուլի ասուլիսին ասաց տեղեկատվական անվտանգության փորձագետ Սամվել Մարտիրոսյանը՝ անդրադառնալով համացանցում Հայոց ցեղասպանության հարյուրերորդ տարելիցի միջոցառումների արձագանքին:

«Google-ում «Հայաստանը որտեղ է», «Հայոց ցեղասպանություն»՝ այսպիսի բանալի բառերի գործածումը երկուսից չորս անգամ աճել է»,-ասաց նա:

Նա նկատեց, որ Twitter-ի ողջ պատմության մեջ երկու-երեք անգամ է եղել, որ հայկական որևէ թեմա հայտնվել է քննարկման մեջ, բայց այս անգամ հայկական թեման  top թեմաների մեջ էր՝ Գերմանիայի,  Ֆրանսիայի,  Իսրայելի՝ ամբողջ աշխարհի մակարդակով, ինչպես նաև Ռուսաստանում թիվ մեկ թեման է եղել երկար ժամանակ:

«Թուրքիայում ֆլեշմոբ սկսվեց, որով ներողություն էին խնդրում ցեղասպանության համար և դա քննարկման ենթարկվեց: Հաջորդ օրը Հայոց ցեղասպանության հարցը դարձավ Թուրքիայում թիվ մեկ թեմա, հազվադեպ է լինում, որ մեկ  թեմա երկար ժամանակ մնում է քննարկման մեջ, իսկ այս թեման երկար մնաց»,-ասաց նա  նկատեց, որ թուրքական ներքին թվիթերում լուրջ պայքար էր գնում, և ազգայնականները, ադրբեջանցիները փորձում էին դիմադրել:

Սամվել Մարտիրոսյանը նշեց, որ երբեմն ադրբեջանցիները ցանկանում են «ավելի կաթոլիկ լինել, քան Հռոմի պապն է» և ցեղասպանության ժխտման հարցում մեծ աշխատանք են տանում:
 

«Բայց, երբ ցունամիի պես ալիքը գալիս է, դրա դեմ բարդ է պայքարել»,-ասաց նա և նշեց, որ  ծանրակշիռ դեմքերի՝ Հայաստան գալը մեծ դեր ունեցավ, և այս ամեն ինչի դեմ աղբ լցնելն այնքան էլ չաշխատեց:

Ինչ վերաբերում է Google-ին, ապա նա ասաց,  Google-ում ողբերգական թեմաներ չեն լինում, սակայն ընկերությունը առաջին էջում տեղադրած սև ժապավենով լուծում տվեց, թեև այն զանգվածը, որը կարող էր դա տեսնել սահմանափակ էր՝ միայն .am-ի այցելուները: